నవతెలంగాణ-దుండిగల్‌
ప్రస్తుత తరుణంలో సమస్యాత్మక సవాళ్లకు అవకాశవాద దృక్పథం, నిరంతర అభ్యాసం, విలువలను సృష్టించే బిజినెస్ లీడర్లు అవసరమని సీడ్‌ వర్క్స్‌ ఇంటర్నేషనల్‌ ప్రయివేట్‌ లిమిటెడ్‌ హైదరాబాద్ మేనేజింగ్‌ డైరెక్టర్‌, సీఈఓ వెంకట్రామ్‌ వసంతవాడ అన్నారు. నిజాంపేట్‌ మున్సిపల్‌ కార్పొరేషన్‌ ప్రగతినగర్‌ పరిధిలోని విజ్ఞాన జ్యోతి ఇన్‌స్టిట్యూట్‌ ఆఫ్‌ మేనేజ్‌మెంట్‌ (వీజేఐఎం) 27వ స్నాతకోత్సవం ఘనంగా నిర్వహించారు. ఈ సందర్భంగా ఆయన మాట్లాడుతూ విద్యార్థులు వారి కెరీయర్‌లో వేలాది మంది జీవితాలను సానుకూలంగా ప్రభావితం చేస్తారని అనడంలో ఎలాంటి సందేహం లేదన్నారు. వీజేఐఎం డైరెక్టర్‌ డాక్టర్‌ సీహెచ్‌. దుర్గాప్రసాద్‌ మాట్లాడుతూ సంస్థ ఆరంభం నుంచి వారు సాధించిన విజయాలు, సంస్థ పురోగతిని వివరించారు.
అనంతరం ప్రతిభ కనబరిచిన విద్యార్థులకు మెడల్స్‌, బహుమతులను అందజేశారు. కార్యక్రమంలో వీజేఐఎం ప్రెసిడెంట్‌ దగ్గుబాటి సురేష్‌ బాబు, విజ్ఞానజ్యోతి సంస్థ ప్రధాన కార్యదర్శి ఇంజనీర్‌ జిఎస్‌ రావు తదితరులు పాల్గొన్నారు.
