నవతెలంగాణ-ఓయూ
తెలంగాణ ఉద్యమంలో ఎంతో మంది విద్యార్థులు బలిదానాలు చేసుకుంటే పరామర్శించని కాంగ్రెస్‌ అగ్రనేత రాహుల్‌గాంధీ ఇప్పుడు ఓయూకు ఏం ముఖం పెట్టుకుని వస్తారని టీఆర్ఎస్వీ నాయకులు మండిపడ్డారు. రాహుల్‌ పర్యటనను నిరసిస్తూ టీఆర్ఎస్వీ ఆధ్వర్యంలో విద్యార్థులు మంగళవారం ఓయూ ఆర్ట్స్‌ కాలేజ్‌ ఎదుట ఆయన దిష్టిబొమ్మను దహనం చేసి నిరసన తెలిపారు. ఈ సందర్భంగా విద్యార్థి నేతలు మాట్లాడుతూ ఉద్యమకాలంలో బలిదానాలు చేసుకున్న కుటుంబాలను పరామర్శించాకే ఓయూలో పర్యటించాలని డిమాండ్‌ చేశారు. అప్పటి వరకు రాహుల్‌గాంధీ ఓయూలో పర్యటించొద్దని.. ఒకవేళ పర్యటిస్తే కచ్చితంగా అడ్డుకుని తీరుతామని నేతలు హెచ్చరించారు. దిష్టిబొమ్మను దహనం చేస్తున్న విద్యార్థి నాయకులను పోలీసులు అరెస్టు చేసి పోలీస్‌స్టేషన్‌కు తరలించారు. కార్యక్రమంలో టీఆర్ఎస్వీ రాష్ట్ర ప్రధాన కార్యదర్శి పెద్దమ్మ రమేష్‌, కార్యదర్శులు జంగయ్య, రాజేష్‌ నాయక్‌, బొల్లు నాగరాజు, శివ, మేకల సందీప్‌, నాగేంద్రబాబు, రవి నాగేంద్ర రావు, పాల్గొన్నారు.
