- వారిలో ధైర్యం నింపేందుకే రాహుల్‌ పర్యటన
- టీపీసీసీ ప్రధాన కార్యదర్శి అదం సంతోష్‌ కుమార్‌
నవతెలంగాణ-ఓయూ
రాష్ట్రంలో రైతుల పరిస్థితి దారుణంగా ఉందని టీపీసీసీ ప్రధాన కార్యదర్శి అదం సంతోష్‌ కుమార్‌ అన్నారు. రైతాంగానికి భరోసా కల్పించి వారిలో ధైర్యం నింపేందుకే ఈనెల 6న వరంగల్‌కు రాహుల్‌గాంధీ వస్తున్నారని తెలియజేశారు. ఓయూను సందర్శిస్తానంటే సీఎం కేసీఆర్‌కు ఎందుకు భయమని ప్రశ్నించారు. రాజకీయాలకు అతీతంగా రాహుల్‌ గాంధీ పర్యటన ఓయూలో ఉంటుందని, అనుమతివ్వాలని కోరారు. రైస్‌ మిల్లర్లతో కుమ్మక్కై ధాన్యం కొనుగోలు ఆలస్యం చేశారని విమర్శించారు.
రాహుల్‌ గాంధీ ఓయూ పర్యటనను స్వాగతిస్తున్నామని తెలంగాణ స్టూడెంట్‌ యూనియన్‌ రాష్ట్ర అధ్యక్షుడు నల్గొండ అంజి తెలిపారు. ఉస్మానియా యూనివర్సిటీ ఆర్ట్స్‌ కళాశాల వద్ద టీఎస్‌యూ విద్యార్థులు సమావేశమయ్యారు. ఈ సందర్భంగా వారు మాట్లాడుతూ తెలంగాణ రాష్ట్రం ఇచ్చిన కాంగ్రెస్‌ పార్టీ అధినేత రాహుల్‌ గాంధీ వస్తే తప్పేంటి అని ప్రశ్నించారు. ఆయన పర్యటనను రాజకీయ కోణంలో చూడవద్దన్నారు. కేవలం విద్యార్థులతో ముఖాముఖీలో పాల్గొని యూనివర్సిటీలో ఉన్న విద్యార్థి సమస్యలు తెలుసుకుంటారని తెలియజేశారు.
