- ముమ్మరంగా చెత్తతొలగింపు, మొక్కలు నాటే పనులు,
- యాంటీ లార్వా ఆపరేషన్స్‌
నవతెలంగాణ-సిటీబ్యూరో
నగరంలో శుక్రవారం నిర్వహించిన పట్టణ ప్రగతి కార్యక్రమంలో ప్రజా ప్రతినిధులు, అధికారులు, ప్రజలు అధిక సంఖ్యలో పాల్గొని విజయవంతం చేశారు. కాలనీ సంక్షేమ సంఘాల ప్రతినిధులు, అధికారులు, కమిటీ మెంబర్లు కలిసి కాలనీలో ఉన్న సమస్యలను గుర్తించారు. వాటిని దశలవారీగా పరిష్కరించేందుకు అధికారులు చర్యలు చేపట్టారు. కాలనీలో చెత్త, భవన నిర్మాణ వ్యర్థాలు, పనికిరాని వస్తువులను, గ్రీన్‌వేస్ట్‌ వెనువెంటనే తొలగించారు. కాలనీల్లో పరిశుభ్రత వాతావరణం కల్పించారు. యాంటీ లార్వా నివారణకు స్ప్రేయింగ్‌ చర్యలు చేపట్టి దోమల నివారణపై అవగాహన కల్పించారు.
కార్యక్రమాలు ఇలా...
పట్టణ ప్రగతిలో మొదటి రోజు 6837 మెట్రిక్‌ టన్నుల చెత్త ఎత్తివేసినట్టు అధికారులు తెలిపారు. 2,188.47 మెట్రిక్‌ టన్నుల భవన నిర్మాణ వ్యర్థాలు ఎత్తివేయడంతోపాటు 180.425 కిలోమీటర్ల మేర ముళ్ల పొదలను తొలగించారు. 21.608 కిలోమీటర్ల మేర నాలా పూడికతీత పనులు చేపట్టారు. శిథిలావస్థలో ఉన్న 6 భవనాలను కూల్చివేశారు. లోతట్టు ప్రాంతాల్లో ఉన్న గుంతలను పూడ్చారు. 1,32,000 ఇళ్లలో స్ప్రేయింగ్‌, ఫాగింగ్‌ చేశారు.25 మంచినీటి ట్యాంక్‌లను శుభ్రం చేశారు.70 పార్కులను శుభ్రం చేశారు. 106 కమ్యూనిటీ భవనాలను పరిశుభ్రం చేశారు. 1126 మరుగుదొడ్లను, 36 వైకుంఠదామాలు/ శ్మశానవాటికలలో ఉన్న వ్యర్థాలను తొలగించి పరిశుభ్రం చేశారు. ఎంటమాలజీ విభాగం ఆధ్వర్యంలో 1,32,000 యాంటి లార్వా చర్యలు చేపట్టారు.1.44 లక్షల ఇళ్లలో ఫాగింగ్‌ చేశారు. గ్రీనరిలో భాగంగా 11,676 మొక్కలు నాటారు. 1,605 మీటర్ల మీడియన్‌ ప్లాంటేషన్‌, 3.32 కిలోమీటర్ల అవెన్యూ ప్లాంటేషన్‌, 3177 హౌం స్టేడ్‌ మొక్కలను పంపిణీ, 0.57 కిలోమీటర్ల రోడ్డు మార్గంలో మల్టీలెవల్‌ అవెన్యూ ప్లాంటేషన్‌, 6,330 మొక్కలకు సాసర్‌ చేసి, కలుపు తీసినట్టు అధికారులు వివరించారు.
