- కాంగ్రెస్‌ పార్టీ సీనియర్‌ నాయకులు లాల్‌ సతీష్‌ గౌడ్‌
నవతెలంగాణ-బడంగ్‌పేట్‌
సమాజంలో విద్యతోనే ప్రతి ఒక్కరికీ మంచి గుర్తింపు వస్తుందని, అందుకు పేద విద్యార్థులకు చేయుతనిస్తే చదువులో రాణించి ఉన్నత శిఖరాలను అధిరోహిస్తారని కాంగ్రెస్‌ పార్టీ నాయకులు లాల్‌ సతీష్‌ గౌడ్‌ అన్నారు. సోమవారం ఆయన మీడియా సమావేశంలో మాట్లాడుతూ ఉన్నత పదవుల్లో ఉన్న వారు ప్రభుత్వ పాఠశాలలో చదివే విద్యార్థులకు చేయూతనిస్తే పేద విద్యార్థులు కూడా రాణిస్తారని అన్నారు. మామిడిపల్లి పరిధిలో ఉన్న రంగనాయకుల కాలనీ ప్రభుత్వ పాఠశాలలో చదివే 224 మంది విద్యార్థులకు నోట్‌ బుక్కులు, పాఠ్య పుస్తకాలను పంపిణి చేశారు. అదేవిధంగా నాదరుగుల్‌ అనాథ ఆశ్రమంలోని పేద విద్యార్థులకు నోట్‌ పుస్తకాలు, పాఠ్య పుస్తకాలు, పంపిణీ చేశారు. ప్రభుత్వ పాఠశాలలో బాగా చదివే విద్యార్థులు ఉన్నారని వారి ఆర్థిక పరిస్థితి బాగా లేక పోవడంతో విద్యకు స్వస్తి పలుకుతున్నారని, ఆర్థికంగా బాగున్నవారు ప్రభుత్వ పాఠశాలలకు వెళ్లి విద్యలో రాణిస్తున్న విద్యార్థులను దత్తత తీసుకుంటే పేద విద్యార్థులు కూడా ఉన్నత శిఖరాలు అధిరోహిస్తారన్నారు. కార్యక్రమంలో పాఠశాల విద్యార్థులు తదితరులు పాల్గొన్నారు.
