- దొడ్డి కొమురయ్య, టీఎన్వీ రమణకు మార్బుల్‌ హమాలీ యూనియన్‌ నివాళి
నవతెలంగాణ-జూబ్లీహిల్స్‌
నిజమైన తెలంగాణ సాయుధ పోరాట యోధులు కమ్యూనిస్టులే అని మార్బుల్‌ హమాలీ యూనియన్‌ నాయకులు అన్నారు. గురువారం శ్రీనగర్‌ కాలనీలో దొడ్డి కొమురయ్య, నవతెలంగాణ దినపత్రిక ఎడిటోరియల్‌ బోర్డు సభ్యులు, సీఐటీయూ మాజీ నాయకులు టీఎన్వీ రమణ చిత్రపటాలకు పూలమాలలు వేసి నివాళి అర్పించారు. ఈ సందర్భంగా నాయకులు ఎన్‌ పాపారావు, ఆర్‌ అశోక్‌ మాట్లాడుతూ భూమి, భుక్తి, వెట్టిచాకిరి విముక్తి కోసం పోరాడి పది లక్షల ఎకరాల భూ పంపిణీ చేసి, 3000 గ్రామాలను విముక్తి చేసిన కమ్యూనిస్టుల పాత్ర అమోఘమైనదని అన్నారు. కేంద్ర ప్రభుత్వం నాలుగు లేబర్‌ కోడ్‌లను తెచ్చి, కార్మిక హక్కులను కాలరాస్తుందన్నారు. లేబర్‌ కోడ్లకు వ్యతిరేకంగా పోరాడాలని, కార్మిక హక్కులను చట్టాలను రక్షించుకోవాల్సిన బాధ్యత మనందరిపై ఉందన్నారు. కార్యక్రమంలో హమాలీ నాయకులు శేఖర్‌ సూర్యనారాయణ, వర్ధన్‌, సత్యనారాయణ, తిరుపతి, రాజు, ఆంజనేయులు పాల్గొన్నారు.