నవతెలంగాణ-కల్చరల్‌
ఒక వ్యక్తి ఎంచుకున్న రంగంలో కృషి చేస్తున్న సందర్భంలో వారి ప్రతిభకు గుర్తింపు సత్కారం, అభినందనమని ప్లీచ్‌ ఇండియా ఫౌండేషన్‌ సి.ఐ.ఓ డాక్టర్‌ శివ నాగిరెడ్డి అన్నారు. శ్రీత్యాగరాయ గానసభలోని కళా సుబ్బారావు కళా వేదికపై జీవీఆర్‌ ఆరాధన కల్చరల్‌ ఫౌండేషన్‌ నిర్వహణలో వివిధ రంగ ప్రముఖులకు పురస్కరాల ప్రదానోత్సవం జరిగింది. డాక్టర్‌ శివనాగి రెడ్డి పాల్గొని మాట్లాడుతూ పురస్కారాలు ప్రోత్సాహకలు అని పేర్కొన్నారు. కళా పోషకుడు చిల్ల రాజశేఖర్‌ రెడ్డి అధ్యక్షత వహించిన సభలో సాహితీకిరణం మాసపత్రిక సంపాదకుడు పొత్తూరి సుబ్బారావు, కవి జానీ బాషా, అరుణ కుమారి తదితరులు పాల్గొనగా కవి పెద్దూరి వెంకట దాసు కార్యక్రమాన్ని నిర్వహించారు. వెంకట రెడ్డి స్వాగతం పలికారు. ప్రతిభా పురస్కార గ్రహీతల్లో లోకం కృష్ణయ్య, సురభి శారద, బి.నరసింహ రావు, కె.సామ్రాజ్యం, ఎన్‌ గణపతి, ఉమ అక్కినేని, దీప చౌదరి మనోజ్‌ చేతన్‌, విద్య లకు ఆప్త మిత్ర పురస్కారంగా నగదు బహుకరించారు.
