నవతెలంగాణ-బంజారాహిల్స్‌
ప్రభుత్వాల తప్పిదాలకు బాధ్యత వహిస్తున్న తమకు ఒక అవకాశం ఇవ్వాలని వినియోగదారులకు తెలంగాణ ఎల్పీజీ డిస్ట్రిబ్యూషన్‌ అసోసియేషన్‌ విజ్ఞప్తి చేసంది. గురువారం బంజారాహిల్స్‌లోని కార్యాలయంలో ఏర్పాటుచేసిన సమావేశంలో అసోసియేషన్‌ సభ్యులు ప్రసంగించారు. దేశంలో చాలా వంటశాలలు, ఆహార పరిశ్రమలు అనేక ఇతర పరిశ్రమలకు జీవనాధారంగా ఎల్పీజీ మారిందన్నారు. ఎల్పీజీని ప్రాథమిక ఇంధనంగా ఉపయోగించే అనేక పరిశ్రమల బడ్జెట్‌లపై వీటి ధర ప్రభావం చూపుతుందని అన్నారు. తెలంగాణ రాష్ట్రంలో, హోటళ్లు, రెస్టారెంట్లు, ఫుడ్‌ కోర్ట్‌లు, క్లౌడ్‌ కిచెన్‌లు, స్ట్రీట్‌ వెండర్లు, ఫుడ్‌ ప్రాసెసింగ్‌ పరిశ్రమలు రాష్ట్రవ్యాప్తంగా అనేక ఇతర పరిశ్రమలు వంటి వివిధ వాణిజ్య సంస్థలకు ప్రతి నెలా 19 కిలోలకు సమానమైన 8 లక్షల వాణిజ్య సిలిండర్‌లను విక్రయిస్తున్నామని తెలిపారు. 8 నవంబర్‌ 2022 నుంచి ఎల్పీజీ చమురు మార్కెటింగ్‌ కంపెనీలు భారత ప్రభుత్వం పెట్రోలియం, గ్యాస్‌ మంత్రిత్వ శాఖ ఆదేశం మేరకు వాణిజ్య ఎల్పీజీపై తగ్గింపులను ఉపసంహరించుకున్నాయని వివరించారు. ముందస్తు నోటీసు లేదా పంపిణీదారులు లేదా కస్టమర్‌లకు ఎలాంటి అధికారిక సమాచారం లేకుండా ఈ నిర్ణయం తీసుకోవడం బాధాకరమైన విషయం అన్నారు. ఒక వారం లేదా 10 రోజుల్లో పరిస్థితులు సాధారణ స్థితికి వస్తాయని, అంతరాయం లేని సరఫరాల కోసం తమ బకాయిలను సకాలంలో చెల్లించడం ద్వారా పంపిణీదారులు సహకరించాలని విజ్ఞప్తి చేశారు. తెలంగాణ రాష్ట్రవ్యాప్తంగా 738 డిస్ట్రిబ్యూటర్లు ఉన్నారని చెప్పారు. సమావేశంలో తెలంగాణ ఎల్పీజీ డిస్ట్రిబ్యూషన్‌ అధ్యక్షులు కె జగన్‌ మోహన్‌ రెడ్డి, కార్యదర్శి శ్రీ చరణ్‌, అశోక్‌, వెంకట్రావు తదితరులు పాల్గొన్నారు.