నవతెలంగాణ-కల్చరల్‌
శ్రీనివాస రెడ్డి స్వరం ప్రభంజనం వలె శ్రావ్యమై సుధా మధురిమల పరిమళాలు వ్యాప్తి చేస్తుందని ప్రముఖ బుల్లితెర నటులు, గాయకులు సాయి కిరణ్‌ అభినందించారు. శ్రీత్యాగరాయ గానసభలో ప్రధాన వేదికపై శ్రీ సరస్వతి కళా పీఠం నిర్వహణలో తల్లపురెడ్డి లక్ష్మీ శ్రీనివాస రెడ్డి చారిటబుల్‌ ట్రస్ట్‌ సౌజన్యంలో వర్ధమాన గాయకుడు శ్రీనివాస రెడ్డికి స్వర కేసరి బిరుదు ప్రదానోత్సవం సంగీతభరితంగా జరిగింది. సాయి కిరణ్‌ తన తల్లి ప్రముఖ గాయకుడు రామకృష్ణ సతీమణి జ్యోతి ఖన్నాతో కలిసి శ్రీనివాస రెడ్డిని స్వర కేసరి బిరుదు ప్రదానం చేసి మాట్లాడారు. శ్రీనివాస్‌ ఉత్తమ గాయకుడే కాక ఉన్నత సామాజిక సేవాపరుడని ప్రశంసించారు. వేదికపై గాయకుడు త్రినాథరావు, సుధా శ్రీనివాస్‌, గుమ్మనేని తదితరులు పాల్గొనగా రోజా ప్రసన్నత స్వాగతం పలికారు. శ్రీనివాస రెడ్డి ఏక గళగానం ప్రభంజనంలా సాగింది. సుబ్రహ్మణ్యం సారథ్యంలో ఇందునయన, విజయలక్ష్మి, రత్న కుమారి, రవి కుమార్‌, బాలాజీ తదితరులు సినీ పాటలు ఆలపించారు.
