- వైఫల్యాలను కప్పిపుచ్చుకోవడానికి మేయర్‌ ఆరాటం
- కార్పొరేటర్‌ ఆకుల శ్రీవాణి అంజన్‌
నవతెలంగాణ- సరూర్‌నగర్‌
వైఫల్యాలను కప్పిపుచ్చుకోవడానికి మేయర్‌ గద్వాల విజయలక్ష్మి ఆరాటపడుతుంది అని సరూర్‌నగర్‌ కార్పొరేటర్‌ ఆకుల శ్రీవాణి అంజన్‌ అన్నారు. మంగళవారం ఏర్పాటు చేసిన సమావేశంలో ఆకుల శ్రీవాణి మాట్లాడుతూ అంబర్‌పేట్‌లో వీధి కుక్కల దాడిలో బాలుడు చనిపోయిన సంఘటనపై మేయర్‌ విజయలక్ష్మి, మంత్రి కేటీఆర్‌ రాసిన స్క్రిప్ట్‌ చదివినట్లుందన్నారు. మున్సిపల్‌ శాఖ మంత్రి కేటీఆర్‌, జీహెచ్‌ఎంసి వైఫల్యంతో ఇలాంటి సంఘటనలు జరిగి ప్రజలు మరణిస్తే కేవలం వచ్చి సారీ అని తమాషా చేయటం వారి చేతగానితనానికి నిదర్శనం అని అన్నారు. ప్రజాప్రతినిధులైన మేము విన్నపాలు చేస్తేనే పట్టించుకోని మేయర్‌ ఈరోజు 4సంవత్సరాల బాబు మరణించిన తర్వాత మీడియా సమావేశంలో అందరి అభిప్రాయాలు తీసుకోవడానికి రెడీ అని చాలా విచిత్రంగా మాట్లాడుతున్నారని ఎద్దేవా చేశారు. మీ వైఫల్యాలను కప్పిపుచ్చుకోవడానికి మొసలి కన్నీరు కారుస్తున్నారు అని, ఇటువంటి సంఘటనలు జరిగినప్పుడే మీకు సమస్యలు గుర్తుకువస్తాయి అని అన్నారు. తూతూ మంత్రంగా ప్రెస్‌మీట్‌లు పెట్టి అధికారులను అదేశిస్తున్నాము, పునరావృతం కానివ్వం అని జూటా మాటలు మాట్లాడుతారు అని ధ్వజమెత్తారు.
