- మేయర్‌ జక్క వెంకట్‌ రెడ్డి
నవతెలంగాణ-బోడుప్పల్‌
విద్యార్థులు తమ చదువును భయంతో కాకుండా ఇష్టపడి చదవాలని అప్పుడే ఉత్తమ ఫలితాలు సాధ్యమవుతాయని పీర్జాదీగూడ మేయర్‌ జక్క వెంకట్‌ రెడ్డి అన్నారు. పీర్జాదిగూడ మున్సిపల్‌ కార్పొరేషన్‌ పరిధిలోని మేడిపల్లి జిల్లా పరిషత్‌ ఉన్నత పాఠశాల విద్యార్థులు పదో తరగతి పరీక్షలకు హాజరు కాబోతున్నందున సందర్బంగా మేయర్‌ జక్క వెంకట్‌ రెడ్డి,కార్పొరేటర్‌ దొంతిరి హరిశంకర్‌ రెడ్డి కలిసి విద్యార్థులకు హాల్‌ టికెట్స్‌ అందజేశారు. ఈ సందర్బంగా ఆయన మాట్లాడుతూ ప్రభుత్వ పాఠశాలలో చదువుతున్న విద్యార్థులు ఆత్మస్థైర్యంతో ఒత్తిడి లేకుండా పరీక్షలు రాయాలని, మంచి మార్కులతో విజయాలు అందుకోవాలన్నారు. విద్యార్థులు ఉన్నతమైన లక్ష్యంతో పాటు ఏకాగ్రత, పట్టుదల ఉన్నప్పుడే ఉన్నత శిఖరాలకు చేరుకోగలుగుతారని కావున విద్యార్థులు అందరూ కష్టపడి చదువుకోవాలన్నారు. కష్టపడితే ఏదైనా సాధించవచ్చని..మీ భవిష్యత్తు కోసం మీ తల్లిదండ్రులు పడుతున్న కష్టాన్ని మరువకూడదన్నారు. ఈ కార్యక్రమంలో ప్రధానోపాధ్యాయులు సత్యప్రసాద్‌, నాయకులు ఏనుగు మనోరంజన్‌ రెడ్డి, ఉపాధ్యాయులు తదితరులు పాల్గొన్నారు.
