Authorization
Mon Jan 19, 2015 06:51 pm
పిల్లల వికాసానికి తల్లిదండ్రుల లాలన, ప్రేమ ఎంతో అవసరం. పిల్లల జీవితంలో వారి ఎదుగుదలకు ఈ అంశాలు ఎంతో తోడ్పడతాయి. ఒక శిశువు ఈ భూమ్మీద జన్మించేందుకు అవకాశం కల్పిస్తున్నామంటే ఒక జీవితకాల సంబంధానికి మనం అంకురార్పణ చేసినట్టే. మిత్రమా.. మన జీవితాల్లో డబ్బు, ఉద్యోగాలు, స్నేహాలు, ఆరోగ్యం, మానవ సంబంధాలు నిలకడగా ఉండవు. కానీ ఒక తల్లిగా, ఒక తండ్రిగా మీ పాత్ర మీ జీవితాంతం నిలిచి ఉంటుంది. మీ పెంపకం ప్రభావం మీ పిల్లలు, ఆ తరువాత వారి పిల్లల మీద తరతరాలుగా ప్రభావం చూపుతుంది. పిల్లల పెంపకాన్ని మనం చాలా ముఖ్యమైన విషయంగా గుర్తించాలి. మనలో ఎవరికీ పిల్లల పెంపకంలో అవసరమైన నైపుణ్యాలు పుట్టుకతోనే అలవడవు. ఈ విషయంలో మనమందరం కొత్తవారమే. మనం పుస్తకాలు చదివి పెద్దలను, స్నేహితులను, నిపుణులను, వైద్యులను, సంప్రదించి పిల్లల పెంపకం గురించి తెలుసుకుంటున్నాం. మనం ఒక ఆదర్శవంతమైన తల్లిగా, తండ్రిగా రూపొందడానికి తగిన విషయ పరిజ్ఞాన మిచ్చే పుస్తకాలు,పత్రికలు మనకు అందుబాటులో ఉన్నాయి.పిల్లల పెంపకం విషయంలో మనం తెలుసుకోవలసిన అంశాలు చాలా ఉన్నాయి. పిల్లల్లో ఆత్మగౌరవాన్ని, ఆత్మ విశ్వాసాన్ని కలిగించే విధంగా పెంచడం తల్లిదండ్రుల ముఖ్యమైన విధి. పిల్లలు తమను తాము అద్భుతమైన వ్యక్తులుగా భావిస్తూ, ఈ ప్రపంచంలోకి అడుగు పెట్టాలి. వారి ప్రతిభను సంపూర్ణంగా వినియోగించుకునే విధంగా వారిని పెంచి పెద్ద చేయాలి. చిన్న తనం నుంచే వారికి శాస్త్రీయ ఆలోచన విధానం అలవర్చాలి. కేవలం తరగతి గదిలో నేర్చుకునే విజ్ఞానమే కాకుండా వారికి ఈ ప్రపంచానికి సంబంధించిన అదనపు విషయాలు నేర్పించాలి. సగటు మనిషికి తన మొదటి 5ఏండ్ల అనుభవాన్ని వదిలించుకు నేందుకు 50 ఏండ్ల కాలం పడుతుంది. మిత్రమా.. ఈ ప్రపంచంలో మనం చూడాలనుకుంటున్న మార్పు మనతోనే ప్రారంభం కావాలి. కానీ మనలో చాలామంది ఎదుటి వ్యక్తి మారాలని అనుకుంటాం. మనం మాత్రం మారం. కనీసం మారేందుకు ప్రయత్నించం. తల్లిదండులు, పిల్లల విషయం లోనూ ఇదే జరుగుతోంది. పిల్లలు పెరిగి యుక్త వయస్సుకు వచ్చిన తరువాత తమ కంటూ కొన్ని అభిప్రాయాలను ఏర్పరుచుకుంటారు. తమకు ఇష్టమైన రంగంలో స్థిరపడాలని అనుకుంటారు. కానీ చాలా మంది తల్లిదండ్రులు పిల్లలు తాము చెప్పినట్టు వినాలని, తమ ఆజ్ఞలు, ఆదేశాలు పాటించాలని అప్పుడే వారి జీవితంలో బాగుపడతారని భావిస్తారు. అయితే ప్రస్తుత ఆదునిక సమాజంలో పిల్లలు రకరకాల ప్రభావాలకు లోనవుతారు. వారిని ఒక కంట కనిపెట్టి ఉండాలి. చెడు మార్గంలో వెళుతున్నారంటే వారిని సరైన దారిలో పెట్టాల్సిందే. అయితే పిల్లల తల్లిదండ్రుల సంబంధం స్నేహ పూర్వకంగా ఉండాలి. వారి మధ్య ఉండేది మితృత్వ వైరుధ్యమే. మనం ఈ విషయాన్ని అర్థం చేసుకోవాలి. అయితే పిల్లల వికాసానికి తల్లిదండ్రుల పెంపకమే ఎంతో ఉపయోగపడు తుంది. ఏదైనా కారణం వల్ల తల్లిదండ్రులు పిల్లలకు సరైన పెంపకాన్ని ఇవ్వలేకపోతే పిల్లల జీవితంపై ప్రభావం చూపు తుందని మానసిక నిపుణులు చెబుతున్నారు. తల్లిదండ్రుల ప్రేమను పూర్తిగా పొందని పిల్లలు జీవితమంతా దాని కోసం తపిస్తారని నిపుణులు చెబుతున్నారు. పిల్లలకు ఇంట్లో లభించే ప్రేమ పరిమాణం, నాణ్యతలను బట్టి వారి శారీరక, మానసిక ఆరోగ్యం పెరుగుదల ఉంటాయి. మొక్కలకు సూర్యరశ్మి, వర్షం ఎంత అవసరమో పిల్లలకు ప్రేమ పూర్వకమైన పోషణ కూడా ఎంతో అవసరం. ఒక్క మాటలో చెప్పాలంటే తల్లిదండ్రుల వ్యక్తిత్వాన్ని అనుసరించే వారి పిల్లలు తయారవుతారు. కొన్ని ఏండ్ల క్రితం న్యూయార్క్లోని ఒక అనాథ శరణాలయంలో పెరిగిన ఒక బాలుడి గురించి ఒక పత్రిక ఇలా రాసింది. ఆ బాలుడి తల్లిదండ్రులు ఒక రోడ్డు ప్రమాదంలో మరణించారు. ఆ పిల్లవాడు తలిదండ్రుల ప్రేమకు దూరమయ్యాడు. ఆ పిల్లవాడి మానసిక ఎదుగుదల ఆగిపోయింది. పక్కవారితో తగవు పెట్టుకోవడం, క్రమశిక్షణ లేకపోవడం జరిగింది. అతని లో మార్పు కోసం మరో హౌంకు మార్చారు. అక్కడ కూడా అతని తీరు మారలేదు. అయితే అక్కడొక అద్భుతం జరిగింది. ఆ పిల్లవాన్ని పెంచుకునేందుకు పిల్లలు లేని ఒక జంట ముందుకు వచ్చింది. వారు ఆ పిల్లవాణ్ని అల్లారు ముద్దుగా పెంచారు. వారి సాన్నిహిత్యంతో అద్భుతమైన మానవ స్పర్శతో అతనిలో పరివర్తన మొదలైంది. అతనిలో క్రమంగా మార్పు వచ్చింది. అందరు పిల్లల మాదిరిగానే ఎదిగాడు. మానసిక పరిపక్వతను సాధించాడు.పిల్లలు తమ ఆస్తి కాదని తల్లిదండ్రులు గుర్తించాలి. పిల్లలు మానసికంగా ఎదిగేందుకు తల్లిదండ్రులు తగిన వాతావరణాన్ని ఇంట్లో కల్పించాలి. ఆదునిక కాలంలో వివిధ కారణాల వల్ల తల్లిదండ్రులకు అదనపు సమస్యలు తలెత్తినా విషయం వాస్తవమే. అయితే మనకు నిత్య జీవితంలో ఎదురయ్యే సమస్యల కారణంగా వారి పట్ల చికాకు ప్రదర్శించడం కూడదు. మానసికంగా ఎదగ నివ్వాలి. వారికి ఈ ప్రపంచంలో అద్భుతమైన అవకాశాలను కల్పించాలి. జీవితంలో స్థిరపడేందుకు తోడ్పాటు నివ్వాలి.
- జి గంగాధర్ సిర్ప,
8919668843