- కుమారుడు చదువు కోసం తండ్రి వాచ్‌ మెన్‌ గా..
- తల్లి ఇళ్లల్లో పాచి పనులు....
- దాతల చేయూత కోసం ఎదురుచూపు
నవ తెలంగాణ - బోనకల్‌
సరస్వతి పుత్రుడిని ఆర్థిక సమస్య వెంటాడుతోంది. ఆ చదువుల కుసుమం తన చదువుకు ఆర్థిక సహాయం చేయాలని దీనంగా వేడుకుంటున్నాడు. ఇందుకు సంబంధించిన వివరాలు ఇలా ఉన్నాయి..బోనకల్‌ మండలం గార్లపాడు గ్రామానికి చెందిన కనకపూడి. నరసయ్య కుమారుడు కీర్తి కుమార్‌ బాల్యం నుంచి కూడా చదువుల్లో చక్కగా రాణించే వాడు. అతని విద్యాభ్యాసం ఒకటవ తరగతి నుంచీ 5వ తరగతి వరకు శ్రీ చైతన్య తుటీకుంట్ల ప్రైవేట్‌ స్కూల్‌లో సాగింది. అక్కడి నుంచి తెలంగాణ సాంఘిక సంక్షేమ పాల్వంచ పాఠశాలలో సీటు సాధించి ఆరవ తరగతి నుంచి 8వ తరగతి వరకు చదువుకున్నాడు. ఆ తర్వాత టిఎస్‌డబ్ల్యు రెసిడెన్సీ కరీంనగర్ సోషల్‌ వెల్ఫేర్‌ స్కూల్‌లో సీటు సాధించి 9వ తరగతి నుంచి 10వ తరగతి చదువుకొని 9.7 సాధించాడు. ఆ తర్వాత హైద్రాబాద్‌లో గల టీఎస్‌ డబ్ల్యూ ఆర్‌ బి ఐ గౌలిదొడ్డీ సోషల్‌ వెల్ఫేర్‌ కళాశాలలో డాక్టర్‌ అవ్వాలనే ఆకాంక్షతో ఇంటర్ బైపీసీ గ్రూప్‌లో సీటు సాధించి ఉత్తమ ప్రతిభ కనబరిచి ఉత్తీర్ణుడయ్యాడు. అనంతరం నీట్‌ ప్రవేశ పరీక్షకు ప్రిపేర్‌ అయ్యాడు. స్వల్ప మార్కుల తేడాతో సీటు రాకపోవటంతో అదే సమయంలో తెలంగాణ రాష్ట్ర ప్రభుత్వం ఎస్సీ, ఎస్‌టీ పేద పిల్లల ఉన్నత చదువుల కోసం అంబేద్కర్‌ ఓవర్సీస్‌ బ్యాంక్‌ ద్వారా ఋణాలు మంజూరు చేస్తాము అని ప్రకటించటంతో కిర్గిస్తాన్‌ కాలేజీలో ఇంటర్ నేషనల్‌ స్కూల్‌ ఆఫ్‌ మెడిసిన్‌ కిర్గిస్తాన్‌ కాలేజీలో ఎంబీబీస్‌ లో చేరాడు. తన కుటుంబం వద్ద వున్న కొంత డబ్బు ఆ చదువుకు వినియోగించుకున్నాడు. కొంత కాలం తర్వాత అంబేద్కర్‌ ఓవర్సీస్‌ బ్యాంక్‌ లోన్‌కీ అప్లై చేసుకోగా లోన్‌ అనేది పీ.జీ చేసే వారికీ మాత్రమే వర్తిస్తుందని బ్యాంక్‌ అధికారులు చెప్పడంతో ఉన్నత చదువుకై అప్లై చేసుకున్న లోన్‌ తిరస్కరించబడింది. అప్పటికే వారి దగ్గర వున్న నగదు మొత్తం ఖర్చు చేసి ఎంబీబీఎస్‌. రెండు సంవ్సరాలు చదువును పూర్తి చేశాడు. ప్రస్తుతం మూడవ సంవత్సరం చాలా ఆర్థిక ఇబ్బందులతో ఉన్నాడు. ప్రస్తుతం పరీక్ష ఫీజు కూడా చెల్లించలేని పరిస్థితులలో కీర్తి కుమార్‌ తల్లీ దండ్రులు ఉన్నారు. కీర్తి కుమార్‌ తల్లిదండ్రులు ఖమ్మంలో ఉంటూ తండ్రి ఒక అపార్ట్మెంట్‌కి వాచ్‌ మెన్‌ గాను తల్లి ఇళ్ల పనులు చేసుకుంటూ చదివిస్తున్నారు. తల్లీ దండ్రులు చాలా ఆర్థిక ఇబ్బందులలో వుండటంతో తమ కుమారుడి చధువుకై దాతల సహాయం కోరుతున్నారు. మానవతా దక్పథంతో సరస్వతి పుత్రుడికి సహాయం అందించ గలరని కోరుతున్నారు. సహాయం చేయదలుచుకున్న వారు ఈ నంబర్‌ ను సంప్రదించగలరు. గూగుల్‌ పే - 9177648520 (పాపగంటి. స్వరూప). వివరాలకు కీర్తీ కుమార్‌ నంబర్‌ 9014414348 ను సంప్రదించగలరు.
