- మొక్కజొన్న కొనుగోలు కేంద్రాలు ప్రారంభం
నవతెలంగాణ- ఖమ్మం
మొక్కజొన్నలను ప్రభుత్వమే కొనుగోలు చేస్తుందని, రైతులు ఆందోళన చెందాల్సిన పని లేదని రాష్ట్ర రవాణా శాఖ మంత్రి పువ్వాడ అజయ్‌కుమార్‌ అన్నారు. ఆదివారం ఖమ్మం నియోజకవర్గం రఘునాథపాలెం మండలం చింతగుర్తి గ్రామం, ఖమ్మం కార్పొరేషన్‌లోని అల్లిపురంలో ప్రభుత్వం మార్క్‌ఫెడ్‌ ఆధ్వర్యంలో ఏర్పాటు చేసిన మొక్కజొన్న కొనుగోలు కేంద్రాన్ని మంత్రి పువ్వాడ ఆదివారం ప్రారంభించారు. ఈ సందర్భంగా మంత్రి మాట్లాడుతూ జొన్నలు క్వింటాలుకు రూ.1962కు చెల్లించి రైతుల వద్ద నుండి కొంటున్నామన్నారు. రైతులు పండించిన మొత్తం పంటను మార్క్‌ఫెడ్‌ ద్వారా కొనుగోలు చేయనున్నట్లు చెప్పారు. గ్రామాల వారీగా రైతులు ఈ అవకాశాన్ని వినియోగించుకోవాలని కోరారు. గతంలో రైతులకు ఉచితంగా కరెంట్‌ కూడా ఇవ్వాలనే పరిస్థితి ఉండేదని, కానీ నేడు రైతులు పండించిన పంటలను నిల్వ చేసుకోలేనంత విస్తారంగా పంటలు పండుతున్నాయని అయన వివరించారు. గతంలో పొలాల్లో మోటార్లు, ట్రాన్స్‌ ఫార్మర్‌లు కాలిపోవడంతో రైతులు తీవ్రంగా ఇబ్బంది పడ్డారని గుర్తు చేశారు. ఆ విషాద ఛాయలను పూర్తిగా పారదొలి వ్యవసాయంలో తెలంగాణను దేశంలోనే అగ్రభాగాన నిలిపిన వ్యక్తి మన ముఖ్యమంత్రి కేసీఅర్‌ అని అన్నారు. ఇప్పటికే రైతు బందు పథకం ద్వారా రైతులకు ప్రతి ఎకరాకు ప్రతి ఏడాది రూ.10 వేలు ఇస్తున్నామని, ఈ పథకం ఐదు ఏళ్ళుగా అందిస్తూ విజయవంతంగా పూర్తి చేసుకుందని అన్నారు. రూపర్‌ పట్టాలు ఉన్న వారికి కూడా రైతుబంధు ఇస్తున్నామని, తెలంగాణ వ్యవసాయ హబ్‌గా నిలిచిందన్నారు. పిండి బస్తాలకు కొదువలేదని, గతంలో మంచుకొండ సొసైటీ ముందు ఎరువుల కోసం క్యూ లైన్‌లో గంటల తరబడి నిలబడి, పోలీస్‌ చేతిలో లాఠీ దెబ్బలు కూడా తిన్న ఘటనలు లేకపోలేదన్నారు. రైతులు పండించిన వడ్లు మొత్తం ప్రభుత్వమే కొనుగోలు చేస్తామని ముఖ్యమంత్రి కేసీఅర్‌ హామీ ఇచ్చారని, తడిచిన ధాన్యం కూడా కొంటామని స్పష్టం చేయడంతో రైతులు ఊపిరి పీల్చుకున్నారని అన్నారు. ఇటీవలే కురిసిన అకాల వర్షాల కారణంగా మొక్కజొన్న పంట నష్టపోయిన వారిని ఆదుకునేందుకు ఖమ్మం జిల్లా బోనకల్‌ మండలంకు రెండు హెలికాప్టర్‌ లలో ముఖ్యమంత్రి కేసీఅర్‌, ఉన్నతాదికారులు వచ్చి ఎకరానికి రూ.10వేలు నష్ట పరిహారం ప్రకటించిన విషయం గుర్తు చేశారు. కార్యక్రమంలో డీసీసీబీ చైర్మన్‌ కూరాకుల నాగభూషణం, వ్యవసాయ మార్కెట్‌ చైర్మన్‌ దోరెపల్లి శ్వేత, మాజీ ఎమ్మెల్సీ బాలసాని లక్ష్మినారాయణ, ఏబి ఎఫ్‌ఏసిఎస్‌ చైర్మన్‌ భీరెడ్డి నాగచంద్ర రెడ్డి, రెవిన్యూ డివిజన్‌ అధికారి రవీంద్రనాథ్‌, మార్క్‌ఫెడ్‌ జిల్లా మేనేజర్‌ సునిత, డిసిఓ విజయ కుమారి, మండల అభివృద్ధి అధికారి రామకృష్ణ, తహశీల్దార్‌ నర్సింహరావు, వ్యవసాయ ఏడిఏ శ్రీనివాసరెడ్డి, కార్పొరేటర్‌ రావూరి కరుణ, సైదుబాబు, సర్పంచ్‌ మెంటెం రామారావు, నాయకులు మద్దినేని వెంకటరమణ, కుర్రా భాస్కర్‌ రావు స్థానిక ప్రజా ప్రతినిధులు తదితరులు పాల్గొన్నారు.
