అ పులి దాడిలో ఆవు మృతి
అ ఫారెస్ట్‌ రేంజ్‌ ఆఫీసర్‌ తేజస్విని
నవతెలంగాణ-పినపాక
పినపాక మండలంలో పులి తిరుగుతుందన్న మాట వాస్తవమేనని, పులి కదలికలను గుర్తించామని బయ్యారం రేంజ్‌ ఫారెస్టు అధికారిని తేజస్వి తెలిపారు. శుక్రవారం ఉదయం మండలంలోని అమరవరం గ్రామానికి చెందిన దాట్ల ముసలయ్య, దాట్ల రమేష్‌ అనే పశువుల కాపర్లు పశువులను మేపడానికి సమీప అడవిలోకి వెళ్లగా, ఆవులమందపై పులి దాడి చేసిందని ఆమె తెలిపారు. పులిని చూసిన భయంతో పశువుల కాపరులు గ్రామం వైపు పరుగులు తీసి, తమకు సమాచారం అందించారన్నారు. మండలంలోని అమరారం, పాండురంగాపురం, మల్లారం, ఎల్చిరెడ్డిపల్లి, గడ్డం పల్లి పరిసర అటవీ ప్రాంత గ్రామాల ప్రజలు అప్రమత్తంగా ఉండాలని అన్నారు. ప్రజలెవరూ కూడా అడవిలోనికి వెళ్లొద్దని, పులి కనిపించిన వెంటనే తమకు సమాచారం అందించాలని కోరారు.