నవతెలంగాణ-ములకలపల్లి
కబడ్డీ జాతీయ స్థాయి పోటీలకు ములకలపల్లి సాంఘిక సంక్షేమ గురుకుల పాఠశాల, కళాశాలకు చెందిన 9 మంది విద్యార్ధినులు ఎంపికైనట్లు కళాశాల ప్రిన్సిపాల్‌ జి.సునీత గురువారం తెలిపారు. నవంబర్‌ 13, 14 తేదీల్లో సెకండ్‌ సీనియర్‌ తెలంగాణ సర్కిల్‌ కబడ్డీ పోటీల్లో అత్యంత ప్రతిభ కనబర్చి జాతీయస్థాయి పోటీలకు ఎంపికయ్యారన్నారు. కళాశాలకు చెందిన కె.నాగేశ్వరి ( సెకండ్‌ బైపీసీ), వి.ఉమామహేశ్వరి (ఫస్టియర్‌ బైపీసీ)లు ఎంపిక కావడంతో వీరిద్దరూ వచ్చే నెలలో గోవాలో జరిగే కబడ్డీ జాతీయస్థాయి పోటీల్లో పాల్గొంటారని తెలిపారు. వీరితో పాటు దురాభవానీ (ఫస్టియర్‌ బైపీసీ), ఎన్‌.వరిత ( 10వ తరగతి)లతో పాటు మరికొందరు జాతీయస్థాయి క్రీడల్లో పాల్గొననున్నట్లు ప్రిన్సిపాల్‌ తెలిపారు. జాతీయ క్రీడలకు ఎంపికైన విద్యార్ధినులను ఆమెతో పాటు కళాశాల, పాఠశాల అధ్యాపక, ఉపాధ్యాయులు ప్రత్యేకంగా అభినందించారు.
