నవతెలంగాణ- బోనకల్‌
మండల పరిధిలోని చొప్పకట్లపాలెం గ్రామానికి చెందిన శీలం గౌతమి ఇంటర్ మొదటి సంవత్సరం ఫలితాల్లో బైపీసీలో ఖమ్మం జిల్లా ప్రథమ స్థానాన్ని రాష్ట్ర స్థాయిలో మూడో స్థానాన్ని సాధించింది. గౌతమి చింతకాని మండలంలోని కస్తూర్బా గాంధీ బాలికల విద్యాలయంలో విద్యాభ్యాసం చేస్తోంది. పల్లెప్రపంచం ఫౌండేషన్‌ చైర్మెన్‌ పల్లా కొండల రావు గౌతమికి హృదయపూర్వక అభినందనలు తెలిపారు. అదేవిధంగా పల్లె ప్రపంచం ఫౌండేషన్‌ తరపున పదివేల రూపాయల నగదు, అభినందన పత్రం అందజేయాలని నిర్ణయించినట్లు ఆయన తెలిపారు. జీనియస్‌ 2022 బహుమతి ప్రధాన సభలో చొప్పకట్లపాలెంలో గౌతమికి సన్మానం కూడా చేయనున్నట్లు ఆయన తెలిపారు. గౌతమి సాధించిన విజయాన్ని స్పూర్తిగా తీసుకొని బాలికలు మరిన్ని విజయాలు సాధించి అగ్రభాగాన నిలవాలని ఆయన కోరారు. గౌతమిని సిపిఎం చొప్పకట్లపాలెం శాఖ కార్యదర్శి చలమల అజరు కుమార్‌ మాజీ కార్యదర్శి చలమల హరికిషన్‌ రావు మండల కమిటీ సభ్యులు కిలారు సురేష్‌ చిరునోముల ఎంపీటీసీ కోటపర్తి హైమావతి చొప్పకట్లపాలెం సర్పంచ్‌ ఎర్రంశెట్టి సుబ్బారావు తదితరులు అభినందించారు.
