తృతీయ స్థానంలో బాలుర జట్టు
హ్యాట్రిక్‌ సాధించిన బాలికల జట్టు
నవతెలంగాణ - బోనకల్‌
రాష్ట్ర స్థాయి బాల్‌ బ్యాడ్మింటన్‌ చాంపియన్‌ షిప్‌ పోటీలలో ఖమ్మం బాలికల జట్టు విజయం సాధించింది. ఖమ్మం బాలికల జట్టు వరుసగా మూడు విజయాలు సాధించి హ్యాట్రిక్‌ నమోదు చేసుకుంది. బాలుర జట్టు తృతీయ స్థానంలో నిలిచింది. హైదరాబాదులోనే వనస్థలిపురంలో ఈనెల 21 నుంచి 23 వరకు 67వ సీనియర్‌ రాష్ట్ర స్థాయి బాల్‌ బ్యాడ్మింటన్‌ ఛాంపియన్‌ షిప్‌ పోటీలు జరిగాయి. ఈ పోటీలలో ఫైనల్లో నిజామాబాద్ జట్టుపై ఖమ్మం బాలికల జట్టు విజయం సాధించింది. ఇటీవల నిజామాబాద్ జిల్లా ఆర్మూర్‌ లో జరిగిన సబ్‌ జూనియర్‌ విభాగంలో ఖమ్మం జిల్లా బాలికల జట్టు ప్రథమ స్థానం సాధించిన విషయం విదితమే. అదేవిధంగా గత నెల హైదరాబాదులో జరిగిన జూనియర్‌ విభాగంలో ఖమ్మం జిల్లా బాలికల జట్టు విజయం సాధించింది. ప్రస్తుతం సీనియర్‌ రాష్ట్రస్థాయి బాల్‌ బ్యాట్మెంటన్‌ పోటీలలో విజయం సాధించి హ్యాట్రిక్‌ విజయాన్ని నమోదు చేసుకున్నారు. అదేవిధంగా బాలుర విభాగంలో జరిగిన పోటీలలో ఖమ్మం బాలుర జట్టు తృతీయ స్థానాన్ని సాధించింది. బాల్‌ బ్యాడ్మింటన్‌ రాష్ట్ర, జాతీయ, అంతర్జాతీయ స్థాయిలో బోనకల్‌ మండల క్రీడాకారులు విజయాలు సాధించుకుంటూ వస్తున్నారు. రాష్ట్ర స్థాయిలో ఛాంపియన్‌ షిప్‌ ను గెలుచుకున్న బాలికల జట్టును బాల్‌ బ్యాట్మెంటన్‌ జిల్లా కార్యదర్శి బొంతు శ్రీనివాసరావు కోచ్‌ అమరేశ్‌ లింగయ్య అభినందించారు.
