నవతెలంగాణ-భద్రాచలం
భద్రాచలంలోని శ్రీ సీతారామచంద్రస్వామి దేవస్థానం ఆధ్వర్యంలో మంగళవారం రామయ్యకు కన్నుల పండువగా నిత్య కల్యాణం నిర్వహించారు. తెల్లవారు జామున 4 గంటలకు ఆలయ తలుపులు తెరిచి, స్వామివారికి సుప్రభాత సేవ జరిపారు. అనంతరం ఆరాధన, సేవాకాలం, నివేదన, నిత్యహౌమాలు, నిత్య బలిహరణం నిర్వహించారు. అలాగే రామాలయం గాలిగోపురానికి అభిముఖంగా ఉన్న ఆంజనేయ స్వామివారికి ఉదయం పంచామృతాలతో అభిషేకం, గంధ సింధూరం, తమలపాకులతో ప్రత్యేక పూజలు జరిపారు. తదుపరి స్వామివారి కల్యాణమూర్తులను మండపంలో వేంచేపు చేసి సంప్రదాయ బద్ధంగా నిత్యకల్యాణం నిర్వహించారు. కల్యాణంలో పాల్గొన్న దాతలకు స్వామివారి ప్రసాదాలను, శేష వస్త్రాలను అందజేశారు.