- పరామర్శలు-ప్రారంభోత్సవాలు
నవతెలంగాణ-అశ్వారావుపేట
ఖమ్మం పార్లమెంటు సభ్యులు నామా నాగేశ్వరరావు, స్థానిక ఎమ్మెల్యే మెచ్చా నాగేశ్వరరావుతో పర్యటించారు. ముందుగా మద్దికొండలో టీఆర్‌ఎస్‌ సీనియర్‌ నాయకులు మాజీ ఎంపీపీ అధ్యక్షులు కాసాని వెంకటేశ్వరరావు నివాసానికి వెళ్లి ఆయన ఆరోగ్య పరిస్థితిని అడిగి తెలుసుకున్నారు. దాదాపు అరగంట పాటు కాసాని నివాసంలో గడిపారు. ఈ సందర్భంగా పలువురు ప్రజాప్రతినిధులు, ఇతరులు తమ గ్రామాలకు రోడ్డు, ఇతర పనులు మంజూరు చేయాలని ఎంపీ నామాకు వినతి పత్రాలు అందించారు. అనంతరం జమ్మిగూడెం రోడ్‌ నుంచి మొద్దులగూడెం వెళ్లే రోడ్‌ వరకు దాదాపు రూ.3.23 కోట్లతో నిర్మించిన పీఎంఎస్‌వై బీటీ రోడ్డును ఆయన స్థానిక ఎమ్మెల్యే మెచ్చాతో కలిసి ప్రారంభించారు. అక్కడే మొక్కలు నాటారు. ఈ సందర్భంగా గుత్తే దారులు తాము చేసిన పనికి బిల్లులు అసలు రాలేదని తెలపగా వెంటనే వివరాలు అడిగి తెలుసుకుంటానని తెలిపారు. అనంతరం నారంవారిగూడెంలో ఇటీవల మృతిచెందిన సహకార సంఘం అధ్యక్షులు నూతక్కి నాగేశ్వరరావు ఇంటికి వెళ్లి ఆయన కుటుంబ సభ్యులను పరామర్శించారు. అనంతరం గ్రామంలో జరిగిన కార్యక్రమంలో పలువురికి ముఖ్యమంత్రి సహాయ నిధి చెక్కులను పంపిణీ చేశారు. కార్య క్రమంలో ఎంపీపీ జల్లిపల్లి శ్రీరామమూర్తి, జడ్పీటీసీ వరలక్ష్మీ, మద్దికొండ, నారంవారిగూడెం సర్పంచ్‌లు భవాని, వెంకట ముత్యం, అచ్యుతాపురం ఎంపీటీసీ కాసాని దుర్గ, టీఆర్‌ఎస్‌ మండల అధ్యక్షులు బండి పుల్లారావు, కార్యదర్శి వెంకన్న బాబుతో పాటు ఎంపీటీసీలు, ప్రజాప్రతినిధులు, టీఆర్‌ఎస్‌ జిల్లా నాయకులు, మండల నాయకులు, వివిధశాఖల ఉన్నతాధికారులు, గ్రామస్తులు పాల్గొన్నారు.
