నవతెలంగాణ-దమ్మపేట
            నాయకపోడు ఆదివాసిలకు అన్ని రాజకీయ పార్టీలు చట్ట సభల్లో తగిన రాజకీయ ప్రాథాన్యత కల్పించాలని నాయకపోడు ఆదివాసి జిల్లా నాయకుడు రావుల శ్రీనివాసరావు అన్ని రాజకీయ పార్టీలకు సూచించారు. ఆదివారం మండల కేంద్రంలోని వినాయక ఫంక్షన్‌ హాల్‌లో నిర్వహించిన అశ్వారావుపేట నియోజకవర్గ ఆదివాసి నాయకపోడు సంఘ సమావేశం జరిగింది. ఈ సమావేశంలో రావుల మాట్లాడుతూ ఆదివాసి నాయకపోడు కులస్తులకు రాజ్యాంగ నిర్మాత బిఆర్‌ అంబేత్కర్‌ కల్పించిన రాజకీయ రిజర్వేషన్లు అమలు చేయాలని డిమాండ్‌ చేశారు. ఈ సమావేశానికి ఉమ్మడి ఖమ్మం జిల్లాలోని అన్ని ప్రాంతాలనుండి నాయకపోడు కులస్తులు హాజరై తమ సంఘీభావాన్ని తెలిపారు. ఈ కార్యక్రమంలో రావుల రామకృష్ణ, కొయ్యలపుల్లయ్య, పాశం వెంకటేశ్వరరావు తదితరులు పాల్గొన్నారు.