- కలెక్టర్‌ దురిశెట్టి అనుదీప్‌
నవతెలంగాణ-కొత్తగూడెం
                 జిల్లాలో సోమవారం నుండి ప్రారంభం కానున్న 10వ తరగతి, ఇంటర్‌ ప్రథమ, ద్వితీయ సప్లిమెంటరీ, ఇంప్రూవ్‌ మెంట్‌ పరీక్షలకు అన్ని ఏర్పాట్లు పూర్తి చేసినట్లు కలెక్టర్‌ దురిశెట్టి అనుదీప్‌ తెలిపారు. ఇంటర్మీడియట్‌ పరీక్షలకు నిర్ణీత సమయంలోగా విద్యార్థులు పరీక్షా కేంద్రాలకు చేరుకోవాలని చెప్పారు. ఇంటర్‌ పరీక్షలకు నిమిషం ఆలస్యంగా వచ్చినా పరీక్షా కేంద్రంలోకి అనుమతించరని చెప్పారు. ఆగష్టు 1వ తేదీ నుండి 10వ తేదీ వరకు నిర్వహించనున్న 10వ తరగతి పరీక్షలకు హాజరయ్యే 1968 మంది విద్యార్థులకు 8 పరీక్షా కేంద్రాలు ఏర్పాటు చేసినట్లు చెప్పారు. అలాగే ఇంటర్‌ ప్రథమ సంవత్సరం సప్లిమెంటరీ, ఇంప్రూవ్‌ మెంట్‌ పరీక్షలు కూడా ఆగష్టు 1వ తేదీ నుండి 10వ తేదీ వరకు నిర్వహించనున్నట్టు చెప్పారు. మొదటి సంవత్సరం సప్లిమెంటరీ, ఇంప్రూవ్మెంట్‌ పరీక్షలకు 2385 మంది విద్యార్థులు, ద్వితీయ సంవత్సర సప్లిమెంటరీ పరీక్షలకు 3475 మంది విద్యార్థులు హాజరు కానున్నారని చెప్పారు. ఇంటర్‌ పరీక్షలు నిర్వహణకు 25 పరీక్షా కేంద్రాలు ఏర్పాటు చేసినట్లు చెప్పారు. ఇంటర్‌ ప్రథమ సంవత్సర పరీక్షలు ఉదయం 9 నుండి మధ్యాహ్నం 12 గంటల వరకు, ద్వితీయ సంవత్సర పరీక్షలు మధ్యాహ్నం 2.30 నుండి సాయంత్రం 5.30 గంటల వరకు జరుగుతాయని చెప్పారు. ఆయా కేంద్రాల వద్ద 144 సెక్షన్‌ అమలులో ఉంటుందని చెప్పారు. విద్యార్థులు ముందుగానే పరీక్షా కేంద్రాలకు చేరుకోవాలని ఆయన సూచించారు.