నవతెలంగాణ- సత్తుపల్లి
సత్తుపల్లి బస్టాండులో బుధవారం మధ్యాహ్నం 1:00 గంటకు చోరీ జరిగింది. ఓ మహిళ హ్యాండుబ్యాగు నుంచి రూ. 35వేలు అపహరణకు గురయ్యాయి. వెంటనే బాధితురాలు పోలీసులకు ఫిర్యాదు చేసింది. చోరీ జరిగిన గంటలోనే సీసీ ఫూటేజ్‌ ఆధారంగా ముగ్గురు చోరులను పోలీసులు బస్టాండ్‌ సమీపంలోనే అరెస్ట్‌ చేశారు. పట్టణ సీఐ టి.కరుణాకర్‌ ఆదేశాల మేరకు ఎస్సై ఎస్కే షాకీర్‌ నేతృత్వంలో పోలీసు సిబ్బంది సత్యనారాయణ, రామకృష్ణ, లక్ష్మణ్‌, శ్రీను బృందం సీసీ ఫూటేజీని పరిశీలించి దొంగలను పట్టుకొనేందుకు బస్టాండ్‌ సమీపంలో పరిశీలన చేశారు. బస్టాండ్‌ సమీపంలో అనుమానాస్పదంగా తచ్చాడుతున్న ముగ్గురు వ్యక్తులను అరెస్ట్‌ చేశారు. పట్టుబడిన ముగ్గరు చోరులు విశాఖపట్టణానికి చెందిన శంకరరావు, కుమారస్వామి, వెంకట సత్యనారాయణ ప్రసాద్‌గా పోలీసులు గుర్తించారు. వారినుంచి చోరీ చేసిన రూ. 35వేలు స్వాధీనం చేసుకున్నారు. కేసు నమోదుచేసి దర్యాప్తు చేస్తున్నట్లు ఎస్సై షాకీర్‌ తెలిపారు.
