- సత్తుపల్లి పోలీసులకు చిక్కిన మోటారు సైకిళ్ల దొంగ
- 5 మోటారు సైకిళ్లు స్వాధీనం, రిమాండ్‌
నవతెలంగాణ- సత్తుపల్లి
దోచుకున్నది అమ్మబోతే గతంలో దొంగిలించి దాచుకున్నవన్నీ పోలీసులు రికవరీ చేసిన ఘటన సత్తుపల్లి పట్టణంలో గురువారం జరిగింది. పోలీసులు తెలిపిన కథనం మేరకు.. భద్రాద్రి-కొత్తగూడెం జిల్లా రుద్రంపూర్‌కు చెందిన కంచర్ల వేణు అనే యువకుడు సత్తుపల్లిలో మోటారుసైకిళ్లను టార్గెట్‌ చేసుకొని తస్కరిస్తూ రుద్రంపూర్‌లోని తన ఇంట్లోనే దాచిపెట్టుకుంటున్నాడు. ఇదే క్రమంలో గురువారం సత్తుపల్లి వచ్చి మరో మోటారుసైకిల్‌ను దొంగిలించేందుకు ప్రయత్నించాడు. వీలుపడకపోవడంతో అతను గతంలో దొంగిలించిన మోటారుసైకిలును విజయవాడలో అమ్ముకునేందుకు సత్తుపల్లి మీదుగా బయలుదేరాడు. అదే సమయంలో సత్తుపల్లి మండలం రేజర్ల సత్తెమ్మతల్లి గుడి వద్ద పోలీసులు సాధారణ వాహనాల తనిఖీ కార్యక్రమాన్ని చేపట్టారు. అటుగా వస్తున్న వేణు పోలీసులను చూసి భయంతో పారిపోతుండగా గమనించిన పోలీసులు అతనిని వెంబడించి పట్టుకుని విచారించారు. అతను వేసుకొచ్చిన మోటారుసైకిలుతో పాటు గతంలో దొంగిలించిన 4 మోటారుసైకిళ్లను పోలీసులు స్వాధీన పరుచుకున్నారు. పట్టణంలో వరుసగా మోటారుసైకిళ్లు చోరీకి గురవుతున్న నేపధ్యంలో సత్తుపల్లి సీఐ టి.కరుణాకర్‌ గట్టి నిఘా పెట్టినట్లు తెలిపారు. మోటారుసైకిళ్ల దొంగతనాలపై పలు సెక్షన్ల కింద వేణుపై 5 కేసులు నమోదు చేసినట్లు సీఐ కరుణకార్‌ తెలిపారు. వాహన తనిఖీ కార్యక్రమంలో పాల్గొన్న కానిస్టేబుళ్లు ఎం.శ్రీనివాసరావు, ఎస్‌.లక్ష్మణరావులను ఈ సందర్భంగా సీఐ అభినందించారు.