నవతెలంగాణ-బూర్గంపాడు
కొత్తగూడెం సింగరేణి కళాశాలలో చదువుతున్న జక్కిరెడ్డి శ్రావ్య భవిష్యత్తులో ఉన్నత శిఖరాలు ఎదగాలని జడ్పీటీసీ కామిరెడ్డి శ్రీలత అన్నారు. శనివారం లక్ష్మీ పురం గ్రామంలో జడ్పీటీసీ క్యాంపు కార్యాలయంలో మోరంపల్లి బంజర గ్రామానికి చెందిన సీనియర్‌ పాత్రికేయులు జక్కిరెడ్డి మల్లారెడ్డి కుమార్తె జక్కిరెడ్డి శ్రావ్యకి ఘనంగా శాలువాతో సన్మానించారు. ఈ సందర్భంగా ఆమె మాట్లాడుతూ మోరం పల్లి బంజర్‌ గ్రామానికి చెందిన జక్కి రెడ్డి శ్రావ్య కొత్తగూడెంలోని సింగరేణి కళాశాలలో మొదటి సంవత్సరం పరీక్ష ఫలితాల్లో 459/470 మార్కులు సాధించి చదువుల తల్లిగా నిలిచారన్నారు. లక్ష్మీపురం గ్రామంలో శ్రీనివాస విద్యా నికేతన్‌ నందు పదవ తరగతి పరీక్షల్లో 10/10 జీపీఏ మార్కులు సాధించి సింగరేణి కళాశాలలో చేరి మొదటి సంవత్సరం మంచి మార్కులతో ఉత్తీర్ణత పొందటం చాలా ఆనందంగా ఉందన్నారు. అనంతరం టిఆర్‌ఎస్‌ పార్టీ మండల నాయకులు గాది నర్సిరెడ్డి మాట్లాడుతూ శ్రావ్య మొదటి నుండి కూడా చదువుల పట్ల ప్రత్యేక శ్రద్ధతో రాణించేదన్నారు. మొదటి సంవత్సరం ఫలితాల్లో 459 మార్కులు సాధించినందుకు చాలా గర్వంగా ఉందన్నారు. ఈ కార్యక్రమంలో మోరంపల్లి బంజర వార్డు సభ్యులు కామిరెడ్డి పద్మ, సీనియర్‌ పాత్రికేయులు జక్కిరెడ్డి మల్లారెడ్డి, జోష్‌, టిఆర్‌ఎస్‌ పార్టీ మండల నాయకులు కామిరెడ్డి రామకొండా రెడ్డి తదితరులు పాల్గొన్నారు.