- సీపీఐ(ఎం) రాష్ట్ర కమిటీ సభ్యురాలు మాచర్ల
- సీనియర్‌ నాయకులు నృసింహాద్రి సంస్మరణ సభ
నవతెలంగాణ- సత్తుపల్లి
            తుదిశ్వాస వరకు ఎర్రజెండానే ఊపిరిగా భావిస్తూ పార్టీ ఆశయ సాధన కోసం సీపీఐ(ఎం) సీనియర్‌ నాయకులు కామెర్ల డాక్టర్‌ నృసింహాద్రి వెంకటేశ్వరరావు పాటుపడ్డారని ఆ పార్టీ రాష్ట్ర కమిటీ సభ్యురాలు మాచర్ల భారతి అన్నారు. సత్తుపల్లిలోని పాలవాడలో జరిగిన వెంకటేశ్వరరావు సంస్మరణ సభలో భారతి ముఖ్య అతిథిగా పాల్గొని ప్రసంగించారు. తన జీవిత చరమాంకంలో పలు ఆటుపోట్లను చవిచూసినా మొక్కవోని ధైర్యంతో ఎవరికి తలవంచక నమ్మిన సిద్ధాంతాన్ని ఆయుధంగా మార్చుకొని బూర్జువా పార్టీల నాయకుల గుండెల్లో దడపుట్టించారని కొనియాడారు. సత్తుపల్లిలో పార్టీ నిర్మాణంలో వెంకటేశ్వరరావు పాత్ర శ్లాఘనీయమన్నారు. ఆయన ఆశయ సాధన కోసం సీపీఐ(ఎం) శ్రేణులు ఆయనను స్ఫూర్తిగా తీసుకొని మరింత ఉత్సాహంతో పార్టీని బలోపేతం చేయాలని భారతి పిలుపునిచ్చారు. సభ ప్రారంభానికి ముందు వెంకటేశ్వరరావు చిత్రపటానికి పూలమాలలేసి నివాళులర్పించారు. ఈ కార్యక్రమంలో సీపీఐ(ఎం) జిల్లా కమిటీ సభ్యులు చలమాల విఠల్‌రావు, జాజిరి శ్రీనివాసరావు, భద్రాద్రి-కొత్తగూడెం జిల్లా సీపీఐ(ఎం) సీనియర్‌ నాయకులు దొడ్డా లక్ష్మీనారాయణ, దమ్మపేట మండల కార్యదర్శి మోరంపూడి శ్రీనివాసరావు, సత్తుపల్లి పట్టణ కార్యదర్శి రావుల రాజబాబు, సీఐటీయూ మండల కన్వీనర్‌ కొలికపోగు సర్వేశ్వరరావు, ఐద్వా నాయకురాళ్లు పాకలపాటి ఝాన్సీ, తిగుళ్ల లక్ష్మీ, నాయకులు రవి, రమేశ్‌, మియావలి, వెంకటేశ్వరరావు పాల్గొన్నారు.