- ఒకరికి తీవ్ర గాయాలు
నవతెలంగాణ-చండ్రుగొండ
                 తహసీల్దార్‌ కార్యాలయం వెళ్లే మార్గం వద్ద జాతీయ రహదారిపై శనివారం ఉదయం జరిగిన రోడ్డు ప్రమాదంలో నలుగురు వ్యక్తులు ప్రాణాపాయం నుంచి బయటపడ్డారు. వీరిలో దామరచర్ల చెందిన స్థానిక నరసయ్యకు తీవ్ర గాయాలయ్యాయి. ప్రత్యక్ష సాక్షులు కథనం ప్రకారం... కొత్తగూడెం నుంచి విజయవాడ వెళుతున్న ఇన్నోవా కారు తహసీల్దార్‌ కార్యాలయం వెళ్లే మార్గం వద్దకు వచ్చేసరికి ద్విచక్ర వాహనంపై ప్రయాణిస్తున్న నరసయ్య కారును గమనించకుండా తహసీల్దార్‌ కార్యాలయం వైపు వెళ్లేందుకు రోడ్డు దాటుతున్నాడు. ఈ సమయంలో కారు డ్రైవర్‌ అప్రమత్తంగా వ్యవహరించి కారును పక్కకు తిప్పాడు. దీంతో కారు విద్యుత్‌ ట్రాన్స్ఫార్మర్ను, విద్యుత్‌ స్తంభాన్ని తప్పించుకుంటూ ముళ్లపదల్లోకి దూసుకెళ్లింది. నరసయ్య కంగారుపడి రోడ్డుపై పడడంతో చేయి విరగడంతో పాటు తీవ్ర గాయాలయ్యాయి. కారులో ప్రయాణిస్తున్న వారికి స్వల్ప గాయాలతో బయటపడ్డారు. నరసయ్యను 108లో స్థానిక ప్రభుత్వాసుపత్రికి తరలించారు.