- తాగునీటి సరఫరా అస్తవ్యస్తం
- పారిశుధ్యం ప్రశ్నార్ధకం
నవతెలంగాణ-అశ్వారావుపేట
            వేసవి సమీపించనేలేదు. కానీ మండలంలో నీటి ఎద్దడి ఛాయలు అపుడే పొడ చూపుతున్నాయి. మండలంలోని 2018లో నూతనంగా ఏర్పడ్డ గుర్రాల చెరువు పంచాయతీలో తాగునీటి సరఫరా సరిగా లేక ఇబ్బందులు పడుతున్నామని సోమవారం ప్రజావాణిలో కలెక్టర్‌ అనుదీప్‌కు పలువురు మహిళలు వినతి పత్రం అందజేసారు. మంగళవారం నవతెలంగాణ ఆ పంచాయతీ సందర్శించగా అక్కడ అనేక సమస్యలు వెలుగులోకి వచ్చాయి. 2017 వరకు మేజర్‌ పంచాయతీ అయిన అశ్వారావుపేటలో 16వ వార్డుగా గుర్రాల చెరువు, మారుతి నగర్‌లను పంచాయతీల పునర్విభజనలో భాగంగా 2018లో నూతన పంచాయతీగా ఏర్పాటు చేసారు. 2011 జనాభా గణాంకాలు ప్రకారం ఈ గుర్రాల చెరువు పంచాయతీ రెండు ఆవాసాలుగా, 234 గృహాలతో 896 మంది జనాభా ఉన్నారు. ప్రస్తుతం 8 వార్డుల పంచాయతీ. ఈ పంచాయతీ పన్నులు రూపేణా పొందే సాలు సరి ఆదాయం రూ.94 వేలు లోపు ఉంటుంది. ఎస్‌ఎఫ్‌సీ, టీఎఫ్‌సీ ద్వారా ప్రభుత్వం ఇచ్చే నిధులు రూ.1 లక్షా 6 వేలు మాత్రమే. ఈ పంచాయతీలో 2 బోరుబావులతో మోటార్లు ఉన్నాయి. నీటి ట్యాంక్‌లు 3 ఉన్నాయి. మిషన్‌ భగీరథ పధ కం ద్వారా నీటి సరఫరా ఉన్నప్పటికీ కలుషితం అయిన నీరు వస్తున్నాయని అక్కడి ప్రజానీకం ఆవేదన చెందుతున్నారు. పంచాయతీలో మొత్తం 21 వీధులు ఉన్నప్పటికీ ఒకే ఒక సిమెంట్‌ రోడ్డు నిర్మించారు. మురిక కాలువలకు సైతం ఒక ఒక చోట పక్కా డ్రైనేజీ మాత్రమే ఉంది. దీంతో పారిశుధ్యం నిర్వహణ మాత్రం అంతంత మాత్రమే అని చెప్పుకోవాలి. ఈ గ్రామంలో ప్రభుత్వ రేషన్‌ దుకాణం లేకపోవడంతో 3 కి.మీ దూరంలో ఉన్న అశ్వారావుపేటకు వెళ్ళి ఉచిత బియ్యం తెచ్చుకోవడానికి కనీసం రూ.50లు ఖర్చు అవుతుందని గ్రామస్తులు విచారం వ్యక్తం చేస్తున్నారు. ఈ పంచాయతీలో 70 శాతం ప్రజానీకం దళితులు, వెనుకబడిన కులాలకు చెందిన వారే కావడంతో పూరి గుడిసెలలోనే అత్యధికులు జీవనం సాగిస్తున్నారు. అయితే ఇటీవల అశ్వారావుపేటను నగర పంచాయతీగా రూపొందించడానికి జిల్లా అధికారులు కార్యాచరణ చేపట్టగా ఈ పంచాయతీకి సైతం అశ్వారావుపేట నగర పంచాయతీలో విలీనం చేయాలని పంచాయతీ తీర్మాణం చేయడం గమనార్హం.
అరకొర నిధులు, విద్యుత్‌ కొరత వేధిస్తున్నాయి
            చిన్ని పంచాయతీ కావడంతో పన్నులు రూపంతో అల్ప ఆదాయం, ప్రభుత్వం ఇచ్చే అరకొర నిధులు అభివృద్ధి పరంగా వేధిస్తున్నాయి. ప్రభుత్వం పంచాయతీలకు ఇచ్చే గ్రాంట్‌ విద్యుత్‌ చార్జీలు, హరితం హారం, ట్రాక్టర్‌ నిర్వహణ కే సరిపోతుంది. దీంతో అభివృద్ధికి నిధులు లేక సతమతం అవుతున్నాం. మంచి నీటి సరఫరాకు సైతం తరుచూ సంభవించే విద్యుత్‌ అంతరాయం అడ్డంకిగా మారింది.
: సర్పంచ్‌ దుర్గయ్య