నవ తెలంగాణ-మధిర
జిల్లా కలెక్టర్‌ వీపీ గౌతమ్‌ మధిర పట్టణంలో బుధవారం పర్యటించి పలు అభివృద్ధి పనులను పరిశీలించారు. తొలుత ట్యాంక్‌ బండ్‌ పనులను పరిశీలించి వేగవంతంగా పనులు పూర్తి చేయాలని ఆదేశించారు. అనంతరం సమీకృత మార్కెట్‌ పనులను పరిశీలించి వారం రోజుల్లోగా పనులు పూర్తి చేయాలన్నారు. అదే విధంగా మున్సిపాలిటీ పరిధిలో చిరు వ్యాపారులకు ఏర్పాటు చేసిన బడ్డీ కొట్లను పరిశీలించి ఈ ప్రాంతంలో మౌలిక వసతులను కల్పించాలన్నారు. ఆ తర్వాత తెలంగాణ తల్లి విగ్రహం నుండి ఎక్సైజ్‌ కార్యాలయం వరకు ఏర్పాటు చేయబోయే నాలుగు లైన్ల రహదారి పనులను పరిశీలించారు. అనంతరం తహసీల్దార్‌ కార్యాలయంలో ఉపాధి హామీ పనులపై ప్రిన్సిపల్‌ సెక్రెటరీ నిర్వహించిన వీడియో కాన్ఫరెన్స్‌ లో పాల్గొన్నారు. ఆ తర్వాత మధిరలో వంద పడకల ఆసుపత్రి వద్ద నిర్మిస్తున్న ఇండోర్‌ స్టేడియం పనులను, వంద పడకల ఆసుపత్రి నిర్మాణ పనులను ఆయన పరిశీలించారు. వంద పడకల ఆసుపత్రి నిర్మాణ పనులు ఎప్పుడు కల్లా పూర్తి అవుతాయని సంబంధిత అధికారులను అడిగి తెలుసుకున్నారు అదేవిధంగా అక్కడ అసంపూర్తిగా నిర్మించి వదిలేసిన స్టేడియం పనులను పరిశీలించి దీనిని వినియోగంలోకి తీసుకురావాలని ఆదేశించారు. ఆయన వెంట తహసీల్దార్‌ రాజేష్‌, ఎంపీడీవో కుడుములు విజయభాస్కర్‌ రెడ్డి, కమిషనర్‌ అంబటి రమాదేవి, మున్సిపల్‌ చైర్‌ పర్సన్‌ మొండితోక లత, వైద్య ఆరోగ్యశాఖ ఈఈ ఉమామహేశ్వరరావు, డిఈ శ్రీనివాసరావు,మధిర ఆసుపత్రి సూపరిండెండెంట్‌ డాక్టర్‌ అనిల్‌, ఐబి డిఈ నాగబ్రహ్మం, ఏఈ వినీత రెడ్డి తదితరులు పాల్గొన్నారు.
వెజ్‌, నాన్‌ వెజ్‌ మార్కెట్‌ నిర్మాణంపై నిర్లక్ష్యం తగదు : కలెక్టర్‌
నవతెలంగాణ-వైరా
నత్తనడకన సాగుతున్న వైరా వెజ్‌, నాన్‌ వెజ్‌ మార్కెట్‌ నిర్మాణంపై జిల్లా కలెక్టర్‌ వి పి గౌతం అసంతృప్తి వ్యక్తం చేశారు. బుధవారం మార్కెట్‌ నిర్మాణ పనులను వైరా తాసీల్డార్‌ ఎన్‌ అరుణ, మునిసిపల్‌ కమిషనర్‌ అనితతో కలిసి పరిశీలించారు. మధిర నుండి వైరా వచ్చిన కలెక్టర్‌ మార్కెట్‌ నిర్మాణ పనులు ఇంత జాప్యంగా ఎందుకు నడుస్తున్నాయని మునిసిపల్‌ కమిషనర్‌, ఏఈ అనితను ప్రశ్నించారు. సుతారి మేస్త్రీలు, వర్కర్స్‌ కొరత వల్ల ఆలస్యం అవుతుందని వివరించగా ఒకింత ఆగ్రహం వ్యక్తం చేశారు. పనులు వేగవంతంగా సాగాలని, రెండు భవనాల పనులు సమాంతరంగా, నాణ్యంగా జరగాలని ఆదేశించి మార్కెట్‌ నిర్మాణ పనులు జాప్యం జరిగితే సహించబోనని హెచ్చరించారు. ఇండోర్‌ స్టేడియాన్ని తొలుత సందర్శించిన ఆయన గురుకుల పాఠశాల విద్యార్థులు ఆడుతున్న షటిల్‌ క్రీడను ఆసక్తిగా తిలకించారు .అనంతరం వైరాలో ఇబ్బడి ముబ్బడిగా కట్టిన ప్లెక్సీలను తొలగించాలని ఆదేశించారు.
