నవతెలంగాణ-నేలకొండపల్లి
        మండలంలోని మోటాపురం గ్రామంలో వీధి కుక్కల దాడిలో రెండు కొండ ముచ్చులు మృతి చెందాయి. గత కొంతకాలంగా మండలంలో వీధి కుక్కలు ఎక్కడ చూసినా గుంపులు గుంపులుగా స్వైర విహారం చేస్తూ దాడులు చేస్తుండడంతో ప్రజలు తీవ్ర భయాందోళనకు గురవుతున్నారు. వీధి కుక్కల బెడదతో ప్రజలు బయట తిరగాలంటేనే బెంబేలెత్తిపోతున్నారు. ఇటీవల కుక్కలు మనుషులకే పరిమితం కాక ఇతర జంతువులపై కూడా దాడులు చేస్తున్న సంబంధిత అధికారులు పట్టించుకోకపోవడంతో ప్రజలు తీవ్ర ఆగ్రహం వ్యక్తం చేస్తున్నారు. గతంలో అనాసాగరం, కోరట్లగూడెం తదితర గ్రామాలలో గొర్రెల గుంపుపై కుక్కలు దాడి చేయడంతో పదుల సంఖ్యలో గొర్రెలు మృత్యువాత పడి రైతులు తీవ్రంగా నష్టపోయారు. ఇకనైనా సంబంధిత అధికారులు తక్షణమే స్పందించి వీధి కుక్కల నివారణకు తగు చర్యలు తీసుకోవాలని ప్రజలు కోరుతున్నారు.