- రూ.20 లక్షలు మేరకు నష్టం
నవతెలంగాణ-బూర్గంపాడు
        అకాల వర్షంతో బూర్గంపాడు మండలం అతలా కుతలమైంది. గత రాత్రి కురిసిన అకాల వర్షంతో మండలంలోని పలు గ్రామాల్లో రైతులకు తీవ్ర నష్టాన్ని తెచ్చిపెట్టింది. ప్రధానంగా బూర్గంపాడు మండలం లక్ష్మీపురం, బూర్గంపాడు గ్రామాల్లోని బొప్పాయి పంటకు తీవ్ర నష్టం వాటిల్లింది. ఈ రెండు గ్రామాల్లో ఉన్న బొప్పాయి పంట పది ఎకరాలలో సాగు అవుతోంది. అకాల వర్షం, గాలి దుమారానికి పూర్తిగా నష్టపోయింది. ఈ నష్టం సుమారు రూ.20 లక్షల మేరకు ఉంటుందని బాధిత రైతులు పేర్కొంటున్నారు. లక్ష్మీపురం గ్రామంలో బొప్పాయి పంట సాగు చేస్తున్న లక్ష్మీ రెడ్డి అనే రైతు పంట పూర్తిగా పాడైపోయింది. శుక్రవారం జిల్లా ఉద్యాన, పట్టు పరిశ్రమల జిల్లా అధికారి జినుగు మరియన్న అకాల వర్షంతో నష్టపోయిన బొప్పాయి పంట ప్రాంతాన్ని పరిశీలించారు. నష్టపోయిన పంట వివరాలను సేకరించి జిల్లా అధికార యంత్రంగానికి నివేదికను అందజేయనున్నట్లు ఆయన తెలిపారు.