- దర్గాలో శీతారాముల కల్యాణం
- శ్రీరామ పట్టాభిషేకం తిలకించిన ఎమ్మెల్యే
నవతెలంగాణ-ఇల్లందు
శ్రీరామనవమి పర్వదినాన్ని పురస్కరించుకొని ప్రతి ఏటా ఎంతో వైభవంగా కన్నుల పండుగ జరుపుకునే శ్రీ సీతారామచంద్ర స్వామి కళ్యాణ మహౌత్సవాన్ని సత్యనారాయణ పురం దర్గా షరీఫ్‌లో గురువారం నిర్వహించగ శుక్రవారం దర్గా ఆస్థాన కమిటీ మాలికులు శ్రీరామ పట్టాభిషేకం ఘనంగా నిర్వహించారు. కార్యక్రమానికి శాసనసభ్యురాలు బానోత్‌ హరిప్రియ హరి సింగ్‌ నాయక్‌, జిల్లా గ్రంథాలయ సంస్థ చైర్మన్‌ దిండిగాల రాజేందర్‌, ఇల్లందు మున్సిపల్‌ చైర్మన్‌ దమ్మలపాటి వెంకటేశ్వరరావు, జిల్లా రైతుబంధు సభ్యులు పులిగండ్ల మాధవరావు
హాజరై శ్రీరామపట్టా భిషేకాన్ని కనులారా వీక్షించారు. పట్టణం మండలంలోని వందలాది మంది ప్రజలు శ్రీరామ పట్టాభిషేకాన్ని తిలకించారు. ఈ సందర్భంగా ఎమ్మెల్యే హరిప్రియ మాట్లాడారు.మతసామరస్యాన్ని ప్రత్యేకంగా నిలిచే సత్యనారాయణపురం ఉర్సు దర్గా షరీఫ్‌ నందు శ్రీ సీతారామచంద్ర స్వామి వారి ఆలయాన్ని నెలకొల్పటంతో పాటు ప్రతి ఏటా శ్రీ రామనవమి సందర్భంగా శ్రీ రాముల వారి కళ్యాణ మహౌత్సవం జరిపించడం అనేది గొప్ప విషయం అన్నారు. మతసామరస్యాన్ని ప్రత్యేకంగా నిలుస్తూ కళ్యాణ మహౌత్సవం తర్వాత భద్రాద్రిని తలపించేలా శ్రీరామ పట్టాభిషేకం నిర్వహించడం అనేది గొప్ప విషయం అన్నారు. భారతదేశ సర్వమత సమ్మేళనం అని ఎంతో గొప్పగా చెప్పుకునే మనం ఇల్లందు నియోజకవర్గంలోని ఇల్లందు పట్టణం నందు గల సత్యనారాయణపురం దర్గా షరీఫ్‌ నందు ప్రత్యక్షంగా చూస్తున్నామని అందుకు ఇల్లందు పట్టణ ప్రజలు ఎంతో అదృష్టవంతులని అన్నారు. ఈ కార్యక్రమంలో ఇల్లందు పట్టణ ప్రధాన కార్యదర్శి పరుచూరి వెంకటేశ్వరరావు, ఒకటో వార్డు కౌన్సిలర్‌ వర రవి, నాయకులు ఎలమందల వాసు, ఇల్లందు పట్టణ యూత్‌ ప్రధాన కార్యదర్శి, సోషల్‌ మీడియా ఇన్చార్జి గిన్నారపు రాజేష, యువజన నాయకులు సుమన్‌, రాకేష్‌, అభి, పాల్గొన్నారు.
