- వేడుకకు హాజరైన రాష్ట్ర గవర్నర్‌
నవతెలంగాణ-భద్రాచలం
          భక్తుల జయ జయ ద్వానాల నడుమ శ్రీరామచంద్రుడు పట్టాభిషిక్తుడయ్యారు...! వేద పండితుల మంత్రోచ్ఛారణలు మారుమోగుతుండగా, వేలాది భక్త జన సందోహం ఆసక్తిగా ఎదురు చూస్తున్న వేళ భద్రాద్రి రాముని పుష్కర పట్టాభిషేకం తన్మయత్వాన్ని నింపింది...! ఈ అపురూప వేడుకకు వేదికైన మిధుల ప్రాంగణం మురిసి మెరిసింది...! శ్రీరామ నామ స్మరణలతో భక్తజన హృదయాలు ఉప్పొంగా యి...! ఇది కలియుగమా..!? లేదా భద్రగిరినా...?! భక్తులు సంభ్రమాశ్చర్యానికి లోనయ్యారు...! పవిత్ర పావన గౌతమి నదీ తీరం చెంత, దక్షిణ అయోధ్య భద్రాచలంలో ఆవిష్కరించబడిన ఈ మహధా ఘట్టాలు రామ భక్తులకు తీపి జ్ఞాపకాలనే పంచాయి.
భద్రాచలంలో కనుల పండువగా శ్రీ రామ పట్టాభిషేకం
ప్రపంచ ప్రసిద్ధిగాంచిన పుణ్యక్షేత్రంగా బాసిల్లుతున్న భద్రాద్రి కొత్తగూడెం జిల్లాలోని భద్రాచలం శ్రీ రామ దివ్య క్షేత్రంలో శుక్రవారం శ్రీరామ పుష్కర పట్టాభిషేకం కనుల పండువగా జరిగింది. ఈ వేడుక అద్యాంతం భక్తి భావాన్ని పంచింది. వేకువ జామునే ఆలయ తలుపులు తెరిచిన అర్చక స్వాములు ముందుగా స్వామివారికి సుప్రభాత సేవ నిర్వహించారు. అనంతరం ఆరాధన ఆరాగింపు జరిపారు. తొలుత రామాలయంలో పొద్దున్నే భద్రుని మండపంలో శ్రీ స్వామి వారి పాదుకులకు అర్చకుల అభిషేకం జరిపారు. అనంతరం రాజ లాంచనాలతో పవిత్ర పావన గౌతమి నదీ తీరం నుంచి తీర్థములు తీసుకొచ్చారు. భక్తుల కోలాటాలు, భాజా భజంత్రీల సందడి నడుమ స్వామివారిని ఊరేగింపుగా నిధుల ప్రాంగణంకు తీసుకొచ్చారు. అక్కడ కల్యాణ మండపంపై స్వామివారిని వేయించేఇంప చేశారు. తొలిత అర్చక స్వాములు విశ్వక్సేన ఆరాధన గావించారు. అనంతరం పుణ్యాహవాచనం జరిపారు. పాదుకలు, రాజదండం, రాజముద్రిక, స్వర్ణ కిరీటం, ఖడ్గం, రత్నాభరణాలు స్వామివారికి ధరింప చేశారు. శ్రీరామ పట్టాభిషేక పారాయణం గావించారు. శుక్ల,యజుర్వేదం, సామవేదం, అధర్వణ వేదం, భగవత్‌ శాస్త్రం తదితర పారాయణం చేశారు. పుష్కర నది జలాలతో మహా కుంభ తీర్థప్రోక్షణ జరిపారు. 11 శ్లోకాలతో స్వామివారికి మంగళహారతి ఇచ్చారు. నిధుల ప్రాంగణంలో భక్తుల జయ జయ ద్వానాలు మారు మోగుతుండగా... జరిగిన శ్రీరామ పుష్కర పట్టాభిషేకం ఆధ్యాంతం భక్తులను కనివిందు చేసింది. పట్టాభిషేక అనంతరం భక్తులపై అర్చక స్వాములు పుణ్య నది జలాలను చల్లారు. శ్రీరామ పుష్కర పట్టాభిషేకానికి తెలంగాణ రాష్ట్ర గవర్నర్‌ తమిళ సై సౌందర్య రాజన్‌, తెలంగాణ రాష్ట్ర గిరిజన సంక్షేమ శాఖ మంత్రి సత్యవతి రాథోడ్‌ హాజరై స్వామివారికి పట్టు వస్త్రాలను అందజేశారు. ఈ కార్యక్రమంలో భద్రాద్రి కొత్తగూడెం జిల్లా కలెక్టర్‌ అనుదీపు, భద్రాచలం ఐటీడీఏ ప్రాజెక్టు ఆఫీసర్‌ గౌతం పోట్రు, ఎస్పీ డాక్టర్‌ వినీత్‌, వివిధ శాఖల అధికారులు తదితరులు పాల్గొన్నారు.