నవతెలంగాణ-కొత్తగూడెంటౌన్‌
ఏప్రిల్‌ 11 మహాత్మ జ్యోతి బాపూలే, ఏప్రిల్‌ 14 డాక్టర్‌ బాబాసాహెబ్‌ అంబేద్కర్‌ జయంతులను పురస్కరించుకుని మహానీయులైనన పూలే, అంబేద్కర్‌ జయంతి వేడుకలు ఘనంగా నిర్వహించాలని ఉత్సవ కమిటీ నిర్ణయించాయి. మంగళవారం కమిటీ కన్వీనర్‌ తాండ్ర వెంకటేశ్వర్లు ఆధ్వర్యంలో సన్నాహక సమావేశం స్థానిక ఎస్సీ, ఎస్టీ సింగరేణి ఆఫీస్‌లో జరిగింది. ఈ కార్యక్రమంలో వక్తలు మాట్లాడుతూ భారత దేశ తొలి సామాజిక విప్లవకారుడు మహాత్మ జ్యోతిబాపూలే అని అలాగే భారత రాజ్యాంగ నిర్మాత ప్రపంచ మేధావి డాక్టర్‌ బాబాసాహెబ్‌ అంబేద్కర్‌ అని వారి జయంతులను ఘనంగా నిర్వహించాలని 14వ తారీకు సాయంత్రం లక్ష్మీదేవిపల్లి మార్కెట్‌ యార్డ్‌ నుండి అంబేద్కర్‌ సెంటర్‌ వరకు జరిగే శోభాయాత్రను ప్రజలందరూ పాల్గొని విజయవంతం చేయాలని పిలుపు నిచ్చారు. ఈ కార్యక్రమంలో ప్రముఖ అంబేద్కర్‌ వాది డాక్టర్‌ మద్దెల శివకుమార్‌, దండోరా రాష్ట్ర ప్రధాన కార్యదర్శి కుసపాటి శ్రీనివాస్‌, సింగరేణి ఎస్సీ, ఎస్టీ, ప్రధాన కార్యదర్శి ఆందోటి నాగేశ్వరరావు, ఆప్‌ నాయకులు గుండపనేని సతీష్‌, కాంగ్రెస్‌ నాయకులు అంథోటి పాల్‌, టిఎమ్‌ఆర్‌పిఎస్‌ నాయకులు గుండా రమేష్‌, బీసీ నాయకులు కురిమళ్ల శంకర్‌, గిరిజన నాయకులు బిక్కులాల్‌, టీజీబీకేఎస్‌ నాయకులు మధుసూధన్‌, తదితరులు పాల్గొన్నారు.
