నవతెలంగాణ-బూర్గంపాడు
          మండలంలోని చర్చీలలో శుక్రవారం భక్తిశ్రద్ధలతో గుడ్‌ ఫ్రైడే వేడుకలు నిర్వహించారు. సర్వ మానవాళి కోసం యేసు క్రీస్తు ప్రభువు సిలువపై మరణం పొందిన రోజున పురస్కరించుకొని ఆయన ప్రార్థన మందిరాలలో ప్రత్యేక ప్రార్థనలు నిర్వహించారు. ఉదయం 9 గంటల నుంచి మధ్యాహ్నం మూడు గంటల వరకు చర్చిలలో ప్రత్యేక ప్రార్థనలు చేసి, ప్రత్యేక గేయాలు ఆలపించారు. ఈ సందర్భంగా భారత దేశ రక్షణ కోసం, ప్రపంచంలో శాంతి వర్ధిల్లాలంటూ పాస్టర్లు ప్రత్యేక ప్రార్థనలు చేశారు. అదే విధంగా సిలువపై యేసుక్రీస్తు ప్రభువు పలికిన ఏడు మాటలను ఆయా ప్రార్ధన మందిరాలలో ప్రత్యేకంగా బోధించారు. బూర్గంపాడు మండలంలోని బూర్గంపాడు, సారపాక, మోరంపల్లి బంజర, లక్ష్మి పురం, సోంపల్లి, పినపాక పట్టీనగర్‌, రెడ్డి పాలెం, ఇరివెండి తదితర గ్రామాల్లో గుడ్‌ ఫ్రైడే వేడుకలు నిర్వహించారు.