- సీపీఐ(ఎం) రాష్ట్ర కార్యదర్శి తమ్మినేని వీరభద్రం
నవతెలంగాణ-నేలకొండపల్లి
ముజ్జుగూడెంలో ఎర్రజెండా యాత్ర తిరిగి ప్రారంభమైందని సిపిఐ(ఎం) రాష్ట్ర కార్యదర్శి తమ్మినేని వీరభద్రం అన్నారు. ఆదివారం రాత్రి మండలంలోని ముజ్జుగూడెం గ్రామంలో జోనల్‌ స్థాయి పార్టీ జనరల్‌ బాడీ సమావేశం సిరికొండ ఉమామహేశ్వరి అధ్యక్షతన జరిగింది. తొలుత గ్రామంలో పార్టీ గ్రామ శాఖ ఆధ్వర్యంలో ఏర్పాటు చేసిన జెండాను ఆయన ఆవిష్కరించారు. అనంతరం జరిగిన సభలో ఆయన మాట్లాడుతూ కమ్యూనిస్టు పార్టీలు, రైతులు, కార్మికులు కష్టజీవులు తరపున పోరాడుతూ సమసమాజ స్థాపన కోసం అనునిత్యం కృషి చేస్తున్నట్లు తెలిపారు. రానున్న కాలంలో దేశవ్యాప్తంగాను, తెలంగాణ రాష్ట్రంలో కూడా కమ్యూనిస్టులకు పూర్వ వైభవం రావడం ఖాయమన్నారు. అందులో భాగంగా కేంద్రంలోని మతోన్మాద బిజెపి పార్టీని గద్దె దించేందుకు కలిసి వచ్చే పార్టీలతో ముందుకు సాగుతామన్నారు. ఈ కార్యక్రమంలో పార్టీ పాలేరు నియోజకవర్గ ఇంచార్జ్‌ బండి రమేష్‌, జిల్లా నాయకులు గుడవర్తి నాగేశ్వరరావు, నవీన్‌ రెడ్డి, సోషల్‌ మీడియా రాష్ట్ర నాయకులు పిట్టల రవి, మండల కార్యదర్శి కెవి రామిరెడ్డి, నాయకులు ఏటుకూరి రామారావు, దుగ్గి వెంకటేశ్వర్లు, డేగల వెంకటేశ్వరరావు, మారుతి కొండలరావు, శాఖ కార్యదర్శి దండా సూర్యనారాయణ, ఉండేమోదుగుల జనార్దన్‌ రావు, సిరికొండ నాగేశ్వరరావు, దండా సత్యనారాయణ తదితరులు పాల్గొన్నారు.