- భూగర్భ గనులతోనే ఇల్లందుకు మనగడ
- విలేకరుల సమావేశంలో మధు
నవతెలంగాణ-ఇల్లందు
భూగర్భ గనులతోనే ఇల్లందుకు మనగడ సాధ్యమని సీపీఐ ఎంఎల్‌ న్యూడెమోక్రసీ రాష్ట్ర కార్యదర్శి వర్గ సభ్యులు ఆవునూరి మధు అన్నారు. గురువారం న్యూడెమోక్రసీ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. బొగ్గు పుట్టినిల్లు ఇల్లందును పరిరక్షించు కోవాల్సిన బాధ్యత ప్రజలందరిపై ఉందని ఆయన అన్నారు. ఓపెన్‌ కాస్ట్‌ల ద్వారా పర్యావరణం దెబ్బతిని ప్రజల ఆరోగ్యాలు దెబ్బతింటాయని, భూములు, జాగలు కోల్పోయి నిలువ నీడ లేక సర్వం కోల్పోయి నిర్వాసితులవుతారని ఆందోళన వ్యక్తం చేశారు. పాలకులు పెట్టుబడిదారుల కార్పొరేట్‌ కంపెనీలకు లాభాలు సమకూర్చేందుకు ఓసీలను తీస్తున్నారని విమర్శించారు. ఓపెన్‌ కాస్ట్‌లకు వ్యతిరేకంగా, అండర్‌ గ్రౌండ్‌ బావుల సాధనకై ప్రజలు ఐక్యంగా ఉద్యమించాలని పిలుపునిచ్చారు. ఈ సమావేశంలో డివిజన్‌ కార్యదర్శి తుపాకుల నాగేశ్వరరావు, ఐఎఫ్‌టీయూ జిల్లా అధ్యక్ష, కార్యదర్శులు తోడేటి నాగేశ్వరరావు, కొక్కు సారంగపాణి నాయకులు డి.మోహన్‌ రావు, పల్లి సుధాకర్‌, పీఓడబ్ల్యు జిల్లా నాయకురాలు చంద్రకళ తదితరులు పాల్గొన్నారు.
