- సీపీఐ(ఎం) రాష్ట్ర కార్యదర్శి వర్గ సభ్యులు పోతినేని సుదర్శన్‌రావు
నవతెలంగాణ - బోనకల్‌
క్రమశిక్షణకు పార్టీ విధేయతకు మారుపేరుగా కోట పుల్లయ్య నిలిచాడని, పార్టీ పట్ల అచంచలమైన విశ్వాసంతో పార్టీ అభివృద్ధికి కోట పుల్లయ్య ఎంతో కృషి చేశాడని సీపీఐ(ఎం)రాష్ట్ర కార్యదర్శి వర్గ సభ్యులు పోతినేని సుదర్శన్‌రావు కొనియాడారు. మండల పరిధిలోని నారాయణపురం గ్రామానికి చెందిన సిపిఎం సీనియర్‌ నాయకుడు కోటా పుల్లయ్య సంస్మరణ సభ సోమవారం పార్టీ మండల కమిటీ సభ్యులు కూచిపూడి మురళీకృష్ణ అధ్యక్షతన సోమవారం జరిగింది. ఈ సందర్భంగా కోట పుల్లయ్య చిత్రపటానికి పోతినేని సుదర్శన్‌ రావు, సిపిఎం రాష్ట్ర కమిటీ సభ్యులు పొన్నం వెంకటేశ్వరరావు, జిల్లా కార్యదర్శి వర్గ సభ్యులు చింతలచెరువు కోటేశ్వరరావు, జిల్లా కమిటీ సభ్యులు మాదినేని రమేష్‌, మండల కార్యదర్శి దొండపాటి నాగేశ్వరరావు పూలమాలలు వేసి ఘనంగా నివాళులర్పించారు. అనంతరం జరిగిన సంస్మరణ సభలో పోతినేని సుదర్శన్‌రావు మాట్లాడుతూ కోట పుల్లయ్య లాంటి వ్యక్తి ఎంతోమందికి ఆదర్శంగా పార్టీ కార్యక్రమాలలో నిలిచాడని కొనియాడారు. ఎన్నో రకాలుగా అవాంతరాలు, ఇబ్బందులు ఎదురైనా మొక్కవోని దీక్షతో సిపిఎంలో కొనసాగుతూ తన శక్తి మేరకు గ్రామంలో పార్టీ అభివృద్ధికి కృషి చేశాడని కొనియాడారు. కార్యక్రమంలో ఆ గ్రామ సర్పంచ్‌ సాదినేని చంద్రకళావతి, సీనియర్‌ నాయకులు సాధినేని మల్లికార్జునరావు, కోటా వెంకటి, కంసాని చలపతిరావు, పోతినేని నరసింహారావు మాజీ సర్పంచ్‌ కోట జములమ్మ తదితరులు పాల్గొన్నారు.
